E nafea ia tauturu i te feia poro apî?
1. Eaha to oe huru i to oe haamataraa i te poro?
1 Te haamanaˈo ra anei oe i to oe haamataraa i te poro? Ua taiâ roa paha oe. Auê ïa oaoa ia fanaˈo i te tauturu a te taata i haapii ia oe aore ra a te tahi atu taata poro, e ere anei? E tavini aravihi oe i teie nei, e nehenehe ïa ta oe e tauturu i te feia poro apî.
2. Ia haapii te feia poro apî i te aha?
2 Ia haapii te feia poro apî e nafea ia haamata i te aparau i te taata, ia faaohipa i te Bibilia i te uputa fare, ia rave i te mau farerei-faahou-raa e ia haamata i te faatere i te mau haapiiraa Bibilia. Ia tamata atoa ratou i te tahi atu mau ravea pororaa, mai te pororaa na te aroâ e te farereiraa i te taata i te mau pu raveraa ohipa. Ia tauturu oe ia ratou ia haamaitai ia ratou i roto i tera mau tuhaa maoti to oe hiˈoraa e ta oe mau manaˈo tauturu.
3. E nafea tatou e tauturu ai ia vetahi ê maoti to tatou hiˈoraa?
3 A haapii maoti te hiˈoraa: Ua faaite Iesu i ta ˈna mau pǐpǐ e nafea ia poro. (Luka 8:1; Pet. 1, 2:21) Ia faanaho oe ia oe e te hoê taata poro apî, a faaineine i te hoê faaiteraa ohie ta ˈna e nehenehe e pee, ma te faaohipa paha i te hoê no roto mai i ta tatou mau papai. E a parau atu e na oe e rave i na uputa e piti matamua, e nehenehe ïa oia e faaroo i ta oe e parau ra. Na mua ˈˈe i te tahi atu uputa, a ani i te taata poro i te mau tuhaa maitai ta ˈna i tapao mai i roto i ta oe faaiteraa. E ite ïa oia i te faufaaraa i te poro e o vetahi atu e i te farii ohie aˈe i to te tahi manaˈo no nia i ta ˈna faaiteraa.
4. E nafea ia tauturu i te taata poro apî i muri aˈe i ta ˈna faaiteraa?
4 A tauturu atu: Ua horoa atoa Iesu i te mau aratairaa i ta ˈna mau pǐpǐ e nafea ia poro. (Mat. 10:5-14) E na reira atoa oe i te tauturu i te taata poro apî. Na ˈna anaˈe e paraparau, a faaroo maitai atu. Ia oti te uputa, a haapopou ia ˈna ma te aau tae no nia i te mau tuhaa taa maitai o ta ˈna faaiteraa noa ˈtu e e tia ia haamaitaihia ˈtu â vetahi. Hou a horoa ˈtu ai i te tahi manaˈo tauturu, e hiˈo paha oe na mua e ua haamaitai anei oia i te reira i to muri iho uputa. Peneiaˈe ua taiâ oia. A haamanaˈo atoa e e ere hoê â aravihi to te taatoaraa o te feia poro, e ua rau te ravea no te rave maitai i te tahi ohipa.—Kor. 1, 12:4-7.
5. Eaha te parau ia tauturu tatou?
5 I te tahi taime e ani mai te hoê taata poro apî i to tatou manaˈo. Aita anaˈe, na oe ïa e omua. E nafea ïa ia ore oia e huru ê? E ani noa ˈtu vetahi feia poro aravihi, “E nehenehe anei au e horoa ˈtu i te tahi manaˈo tauturu?” aore ra, “Eaha to oe manaˈo i te mea i tupu?” E nehenehe atoa e parau, “A haamata ai au i te poro, e mea fifi roa no ˈu ia . . . , na te . . . râ i tauturu ia ˈu.” E mea maitai i te tahi taime ia hiˈo i te buka Haaferuriraa e o ˈna. A horoa i te manaˈo tauturu no nia i te hoê noa tuhaa o ta ˈna faaiteraa ia ore oia ia huru ê.
6. E nafea ‘te auri e faaanaana ˈi i te auri’ i roto i te taviniraa?
6 E faaanaana te auri i te auri: Ua faaitoito Paulo ia Timoteo, e taata poro aravihi, ia rohi â i te haapii e i te haere i mua. (Tim. 1, 4:13, 15) Noa ˈtu e e mea maoro i teie nei to oe haamataraa i te poro, eiaha roa ˈtu oe e faaea i te faaaravihi ia oe. A haapii mai i te feia poro ta oe e apiti ra, i tei iti aˈe te aravihi atoa. A tauturu ia vetahi ê ma te au, i tei poro apî iho â râ, ia riro ei taata poro aravihi o te parau apî maitai.—Mas. 27:17.