Eaha ta vetahi ê e haapii ia hiˈo ratou ia outou?
1. Eaha ta te mau pǐpǐ a Iesu i haapii ma te hiˈo ia ˈna?
1 Ua parau Iesu: “A rave mai i tau zugo i nia ia outou, e ia haapiihia outou e au.” (Mat. 11:29) Ma te papu, ua haapii atu oia maoti to ˈna hiˈoraa maitai, eiaha noa na roto i ta ˈna mau parau. A feruri na i ta te mau pǐpǐ i haapii ma te hiˈo ia ˈna. E mea mǎrû, maitai e te aroha oia. (Mat. 8:1-3; Mar. 6:30-34) E mea haehaa mau atoa. (Ioa. 13:2-5) I roto i te taviniraa, ua ite te mau pǐpǐ e e rave ohipa rohirohi ore o Iesu e te aravihi i te haapii atu i te parau mau. (Luka 8:1; 21:37, 38) Te nafea ra vetahi ê ia hiˈo mai ratou ia tatou i roto i te taviniraa?
2. E nafea to tatou haerea maitai i roto i te taviniraa e ohipa maitai ai i nia i te fatu fare?
2 Te taata: E ohipa puai to tatou ahu-maitai-raa, ta tatou mau peu maitai, e to tatou anaanatae mau i nia i te taata. (Kor. 2, 6:3; Phil. 1:27) E ite ratou e te faaohipa pinepine ra tatou i te Bibilia. E putapû vetahi ê ia faaroo atu tatou ia ratou ma te faatura. Eiaha roa ˈtu e haafaufaa ore i te hiˈoraa maitai ta tatou e horoa i roto i tera mau tuhaa, e nehenehe hoi te reira e turai i te taata ia farii i te poroi o te Basileia.
3. Eaha te faahopearaa maitai o to tatou haerea i nia i to tatou mau taeae?
3 To tatou mau taeae: A feruri atoa i te faahopearaa maitai o to tatou haerea i nia i to tatou mau taeae. E peehia ratou i to tatou itoito rahi no te taviniraa. Mai te auri e faaanaana i te auri, e faaitoito ta tatou faaineine-maitai-raa ia ratou ia haamaitai i ta ratou pororaa. (Mas. 27:17) Ia tapaopao tatou i ta tatou aparauraa e te feia tei anaanatae e ia hoˈi oioi tatou e farerei i taua mau taata ra, e na reira atoa ïa to tatou mau taeae. E ohipa maitai tatou i nia i to tatou mau hoa haamori ma te rave faahope roa i ta tatou taviniraa.—Tim. 2, 4:5.
4. No te aha e hiˈopoa tamau ai i to tatou haerea?
4 No te aha e ore ai e hiˈopoa tamau i ta tatou e rave ra e e parau ra e te faahopearaa o to tatou haerea i nia ia vetahi ê? E oaoa Iehova i to tatou hiˈoraa maitai e e hoê â atoa ïa to tatou huru aau e to te aposetolo Paulo, tei parau: “Ei pee mai outou ia ˈu mai ia ˈu atoa e pee i te Mesia nei.”—Kor. 1, 11:1.