Pahonoraa i ta outou mau uiraa
◼ E mea tia anei ia opere haere te mau Ite no Iehova i te mau oreroraa parau papaihia aore ra haruharuhia?
E haapuai e e faaitoito te mau oreroraa parau Bibilia ia tatou. (Ohi. 15:32) E hinaaro iho â tatou ia ite atoa te feia tei ore i tae mai i te putuputuraa i teie mau haamaramaramaraa faaitoito. E te mau ravea haruharuraa rau e vai ra i teie nei, e mea ohie roa ia haruharu e ia opere haere i te hoê oreroraa parau. E haapueraa oreroraa parau ta vetahi, tei haruharuhia paha a tau matahiti aˈenei. Ma te manaˈo maitai e horoa ratou i te reira na to ratou mau hoa. Ua hamani te tahi atu i te mau afata poroi Web e ua tuu i te mau oreroraa parau i nia iho ia nehenehe te taata e rave.
Aita iho â e opaniraa ia haruharu tatou i te mau oreroraa parau na tatou iho aore ra na to tatou utuafare. Hau atu â, e faanaho paha te mau matahiapo ia haruharuhia te mau oreroraa parau no te mau melo tino paruparu o te amuiraa tei ore e nehenehe e tae mai i te mau putuputuraa. Teie râ, e tumu maitai ta tatou no te ore e opere haere i te mau oreroraa parau papaihia aore ra haruharuhia.
Pinepine te taeae orero i te manaˈo i te mau hinaaro o te amuiraa. E nehenehe paha tatou e tatara ma te hape i te tahi mau manaˈo i te mea e aita tatou i ite i te tumu i vauvauhia ˈi te reira. Hau atu â, e mea fifi ia ite afea e na vai i horoa i te oreroraa parau ia papu ia tatou e e mea tano e e mea mau te mau manaˈo i vauvauhia. (Luka 1:1-4) Taa ê atu, na roto i te opere-haere-raa i te mau oreroraa parau papaihia aore ra haruharuhia, e nehenehe vetahi e horoa aore ra e farii i te tahi hanahana tei ore hoi e tano.—Kor. 1, 3:5-7.
Te haa puai ra te tavini haapao maitai e te paari no te horoa i “te tufaa” maa varua tano i te taime au. (Luka 12:42) Oia atoa ïa te mau oreroraa parau i roto i te mau amuiraa a te mau Ite no Iehova e te mau haruharuraa te nehenehe e ravehia mai i nia i te afata poroi Web jw.org. E nehenehe tatou e tiaturi e e horoa mai te tavini haapao maitai e te paari e to ˈna Tino aratai i ta tatou e hinaaro no te mau papu i roto i te faaroo.—Ohi. 16:4, 5.