Te hoê tauturu no te atuatu i to tatou mau taairaa e te Atua
1. Eaha te tahi ravea a Iehova no te tauturu ia tatou ia rave i ta ˈna i faaue mai?
1 Te horoa rahi maira Iehova i te haamaramaramaraa, te faaineineraa, e te faaitoitoraa hinaarohia no te rave i ta ˈna i faaue mai, e poro i te evanelia. (Mat. 24:14; Tim. 2, 4:17) Hoê o taua ravea ra, o ta tatou ïa tairururaa haaati tamatahiti. E hohora mai te porotarama apî no te matahiti taviniraa 2010 i te manaˈo tumu “A atuatu i to oe mau taairaa e te Atua,” niuhia i nia i te Roma 8:5 e te Iuda 17-19. E haamata te reira i te hebedoma o te 31 no Atete 2009.
2. (a) E nafea tatou e faufaahia ˈi i te tairururaa haaati? (b) Mea nafea te mau tairururaa haaati i mahemo i te tautururaa ia oe i roto i te taviniraa?
2 E nafea tatou e faufaahia ˈi?: E faaarahia tatou i te mau fifi atâta e vai ra, mai te mau faaanaanataeraa o te amu i to tatou taime e o te faafariu ê ia tatou i te mea faufaa mau. E haapii tatou e nafea ia patoi i te huru faatia noa, e eaha te hoê taata e taairaa maitai to ˈna e te Atua. E faaite mai te oreroraa parau tatuhaahia o te Tapati e nafea te taata e te mau utuafare e haapuai ai i to ratou mau taairaa e te Atua i mua i te mau faaheporaa e tamataraa iino o te faaroo e maraa noa ˈtura. E tauturu mai te tairururaa ia tiai i to tatou aau, ia riro ei Kerisetiano haapao maitai itoito, e ia haamanaˈo i te mau haamaitairaa faahiahia e tiai ra i te feia e atuatu ra i to ratou mau taairaa e te Atua.
3. (a) Afea ta oe tairururaa haaati e tupu ai? (b) Eaha ïa ta oe faaotiraa e tia ˈi?
3 A ite ai oe afea e ihea ta oe tairururaa haaati e tupu ai, a faanaho ia oe no te tae atu e no te faaroo maitai atu i te mau tuhaa atoa o na mahana e piti. Ia papu ia oe e e haamaitai Iehova i te feia e faaitoito ra.—Mas. 21:5.
4. Eaha ta tatou e papu i te fanaˈo i ta tatou tairururaa haaati i mua nei?
4 O Iehova te Tumu o teie ô maitai. Mea tano maitai iho â ïa te porotarama faaineinehia e te pǔpǔ o te tavini haapao maitai ia tamau â tatou ei Kerisetiano. Te mauruuru nei tatou ia Iehova no te taatoaraa o ta ˈna mau faanahoraa î i te here o te tauturu ia tatou ia “papu maite to tatou mauraa i ta tatou parau, ma te aueue ore.”—Heb. 10:23-25; Iak. 1:17.