E nafea ia faaohipa i te buka “Te here o te Atua” no te faatere i te mau haapiiraa bibilia
1. Eaha te fa o te buka “Te here o te Atua”?
1 Ua oaoa roa tatou i te fanaˈoraa i te buka apî “Ia vai maite outou i roto i te here o te Atua” i ta tatou tairururaa mataeinaa “Arataihia e te varua o te Atua”! Mai tei faaarahia, ua neneihia teie buka no te tauturu ia tatou ia ite e ia hinaaro i te mau ture aveia a Iehova no nia i te haerea eiaha râ no te haapii atu i te mau haapiiraa bibilia tumu. Eita ïa tatou e pûpû i teie buka i tera i tera fare.
2. E nafea teie buka e faaohipahia ˈi, e e o vai?
2 O te piti teie o te buka e haapiihia ˈtu e te mau piahi Bibilia ia oti te buka Bibilia haapii. A haamanaˈo e e ere hoê â tupuraa pae varua to te taata. E mea tia ïa ia faaterehia te haapiiraa taitahi ia au i te faito e au i te piahi. Ia papu ia oe e ua maramarama maitai te piahi i te tumu parau e hiˈopoahia ra. I te rahiraa o te taime, eiaha e faaohipa i teie buka no te haamata i te mau haapiiraa bibilia e te mau taata o tei haapii aˈena paha e rave rahi buka na mua ˈˈe aita râ e haere ra i te mau putuputuraa a te amuiraa e aita roa ˈtu e hinaaro ra e faaau i to ratou oraraa i nia i te pue parau mau bibilia ta ratou i haapii.
3. Eaha te titauhia ia rave tatou mai te peu e te faatere nei tatou i te hoê haapiiraa i nia i te buka Adorez Dieu (aore ra Tahoêhia)?
3 Mai te peu e te faatere nei oe i te hoê haapiiraa i nia i te buka Adorez Dieu (aore ra Tahoêhia) e tei te mau pene hopea oe, e faaoti paha oe i te faahope roa i tera buka e i te faaitoito atu i te piahi ia taio i te buka “Te here o te Atua” no ˈna iho. Aita anaˈe, e mea maitai aˈe ia haere i nia i te buka apî e ia haamata mai te omuaraa mai iho â. Mai no te buka Bibilia haapii, na oe e maiti i te tauaparau aore ra eita i te mau tumu parau o te tuhaa hau.
4. Eaha te titauhia ia rave tatou ia bapetizohia ta tatou piahi hou a oti ai na buka Bibilia haapii e “Te here o te Atua”?
4 Ia bapetizohia te piahi hou a oti ai na buka e piti atoa, e titauhia ia tamau noa te haapiiraa e ia oti roa te buka “Te here o te Atua.” Noa ˈtu e ua bapetizohia te piahi, e nehenehe oe e taio i te taime, te farerei-faahou-raa, e te haapiiraa. E nehenehe atoa te taata poro e apee ra ia oe e e apiti ra i te haapiiraa e taio i te taime.
5. E nafea te buka “Te here o te Atua” e faaohipahia ˈi no te tauturu i te mau taata poro o tei ore i apiti i te taviniraa tau taime i teie nei?
5 Mai te peu e ua faataa te hoê melo o te tomite tiaauraa a te amuiraa ia oe ia faatere i te hoê haapiiraa bibilia e te hoê taata aita e poro faahou ra, e anihia paha oe ia hiˈopoa e o ˈna i te tahi mau pene taa maitai o te buka “Te here o te Atua.” Eita e titauhia ia faaterehia teie mau huru haapiiraa no te hoê taime roa. E faanahoraa maitai roa ta tatou i roto i teie buka apî, neneihia no te tauturu ia tatou ia vai maite “i roto i te here o te Atua”!—Iuda 21, MN.