Ia paraparau te fatu fare i te tahi atu reo
1. No te aha e hinaaro-rahi-noa-hia ˈi te haa-amui-raa ia porohia te tuhaa fenua?
1 Te pinepine noa ˈtura te feia poro i te Basileia e ati aˈe te ao nei i te ite mai i te feia anaanatae e paraparau ra i te hoê reo ê atu i to te amuiraa. No te tauturu i tera mau taata i te pae varua, e rave rahi amaa tei manaˈo e mea maitai ia haamauhia te mau pǔpǔ e te mau amuiraa reo ê. I te mea e e rave rau reo te nehenehe e paraparauhia i te hoê vahi, e poro paha tau amuiraa reo ê i roto i te hoê â tuhaa fenua. E nafea ïa te mau amuiraa e haa amui ai ia papu e te ravehia ra te ohipa pororaa ma te naho maitai?—Kor. 1, 14:33.
2. Ia poro i tera i tera fare, e nafea tatou e haa amui ai e te tahi atu pǔpǔ aore ra amuiraa reo ê o te reira vahi?
2 Te haa-amui-maitai-raa: A poro ai na te mau aroâ aore ra ma te faanaho-ore-hia, e mea maitai ia haafatata ˈtu te taata poro i te mau taata atoa, noa ˈtu eaha to ˈna reo, e ia pûpû atu i te hoê papai i roto i te reo ta ˈna e au i te taio. A poro ai râ i tera i tera fare i te mau vahi e poro-atoa-hia ra e vetahi atu pǔpǔ aore ra amuiraa reo ê, e mea maitai ïa ia haapao te taata poro, mai tei matauhia, i te mau fare o te feia e paraparau ra i te reo o te amuiraa ta ˈna e apiti ra. Ia poro e rave rahi amuiraa i te hoê â vahi, e mea faufaa roa ia haapao-maite-hia te tapura tuhaa fenua. E mea maitai ia aparau te mau tiaau no te taviniraa te tahi i te tahi e ia faanaho i te reira ia faufaahia te taatoaraa. (Mas. 11:14) Ia poro râ te hoê taata poro i tera i tera fare a farerei atu ai i te hoê taata o te paraparau ra i te tahi atu reo e aita e amuiraa fatata na roto i tera reo, e tutava ïa te taata poro i te horoa ˈtu i te faaiteraa e i te atuatu i te anaanatae e tia ˈi.
3. Eaha to tatou huru ia farerei tatou i te mau taata poro no te hoê pǔpǔ aore ra amuiraa reo ê i roto i te hoê â tuhaa fenua?
3 Te hoê â ohipa: E nafea ïa ia poro te mau taata poro o na amuiraa i te hoê â vahi e i te hoê â mahana? Parau mau, e na nia ˈˈe te here Kerisetiano i te fifi o te reo, e e haapeapea na mua roa te taatoaraa i te mau hinaaro o te taata o te tuhaa fenua. (Ioa. 13:34, 35) E faaite ïa te feia e tiaau ra i te mau pǔpǔ i te huru tano noa e te here ma te faaoti paha ia haere te hoê pǔpǔ, no te hoê taime noa, i te hoê tuhaa fenua ê atu.—Iak. 3:17, 18.
4. Te tupu nei teihea parau tohu i teie mahana?
4 Ua tohu te Bibilia e e faaroo te taata o te mau reo atoa i te parau apî maitai. (Apo. 14:6, 7) Na roto i te hoê haa-amui-maitai-raa o te taatoaraa, e ape ïa tatou i te haere faufaa ore noa e piti taime i te hoê â fare, e i te na reiraraa e nehenehe tatou e faaite i te parau apî maitai i e rave rahi atu â taata, i te feia atoa e paraparau ra i te tahi atu reo.—Eph. 4:16.