A tamahanahana i te feia e oto ra
1. No te aha te taata e oto ra e hinaaro ai i te tamahanahanaraa?
1 Mea peapea roa ia pohe te hoê taata herehia e tatou, no te taata iho â râ e ere nei i te tiaturiraa o te Basileia. (Tes. 1, 4:13) Mea pinepine e rave rahi i te uiui: ‘No te aha te taata e pohe ai? Eaha te tupu i nia ia ratou ua pohe anaˈe? E ite faahou anei au i tei herehia e au i te hoê mahana?’ E manaˈo tauturu to muri nei no te tamahanahana i te feia ta tatou e farerei i roto i te taviniraa o te oto ra no te mea ua pohe te hoê fetii aore ra te hoê hoa.—Isa. 61:2.
2. Ia parau mai te hoê fatu fare e te mihi nei oia, e mea tia anei ia tamata noa tatou i te horoa i te hoê faaiteraa rahi?
2 I tera fare i tera fare: E parau mai paha te hoê fatu fare e no pohe noa ˈtura te hoê i roto i to ˈna utuafare. Te mihi noa ra anei oia? E mea rahi anei te fetii e mihi ra i roto i te fare? I roto i te reira mau tupuraa, e mea maitai aˈe eiaha ia horoa i te hoê faaiteraa rahi. (Koh. 3:1, 7) E nehenehe paha tatou e faaite atu i to tatou aumauiui, e horoa ˈtu na ˈna i te hoê api parau, vea, aore ra buka rairai e tano, e e vaiiho atu ia ˈna ma te peu maitai. E e nehenehe tatou e hoˈi faahou e hiˈo ia ˈna i te hoê taime maitai aˈe no te faaite i te tamahanahanaraa no roto mai i te Bibilia.
3. Ia tano te mau tupuraa, teihea mau irava te tia ia tatou ia faaite i te hoê fatu fare o te mihi nei?
3 I te tahi atu taime, e haroaroa paha tatou e e nehenehe â e paraparau i te farereiraa matamua. Noa ˈtu e e ere tera te taime no te patoi i te mau manaˈo hape, e nehenehe tatou e taio ia ratou i te mau parau fafau o te Bibilia no nia i te tia-faahou-raa. (Ioa. 5:28, 29) Aore ra e faaite tatou eaha ta te Bibilia e parau ra no nia i te huru o te feia pohe. (Koh. 9:5, 10) E nehenehe atoa te hoê faatiaraa bibilia o te hoê tia-faahou-raa e horoa i te tamahanahanaraa. (Ioa. 11:39-44) Te tahi atu ravea o te hiˈopoaraa ïa i te mau parau o te tiaturiraa ia Iehova a te taata haapao maitai ra o Ioba. (Ioba 14:14, 15) Hou a haere ai, e nehenehe tatou e pûpû atu Eaha te tupu i nia ia tatou ia pohe tatou?, Ia pohe tei herehia e outou na, aore ra te tahi atu buka rairai aore ra api parau e tano. Aore ra e nehenehe tatou e vaiiho atu i te buka Bibilia haapii, e huti i te ara-maite-raa i nia i te mau haamaramaramaraa o te pene 6, e e faanaho i te tauaparau atu â i nia i te reira tumu parau ia hoˈi mai tatou.
4. Eaha ˈtu â te taime e nehenehe ai tatou e horoa i te tamahanahanaraa?
4 I te tahi atu taime: Ia faanahohia te hoê hunaraa maˈi aore ra oroa hunaraa i te Piha a te Basileia, to reira anei te feia e ere i te Ite no Iehova? E nehenehe e faanaho i te mau papai o te tamahanahana no ratou. Ua oaoa te tahi mau fare hunaraa maˈi i te fanaˈoraa i te tahi mau papai e tano no te mau utuafare e mihi ra. I te tahi taime, ua faatupu te mau parau tapao aroha i roto i te vea i te hoê ravea no te papai i te hoê rata i te mau melo utuafare e oto ra. I te hoê mahana, i muri aˈe i te taeraa mai te hoê rata tae noa ˈtu te tahi mau api parau, ua haere te hoê tane ivi e ta ˈna tamahine i te fare o te taata poro e ua ui atu: “O oe te taata tei hapono mai i teie rata? Te hinaaro ra vau e ite hau atu â no nia i te Bibilia!” Ua farii te tane e ta ˈna tamahine i te hoê haapiiraa bibilia e ua haamata i te haere i te mau putuputuraa a te amuiraa.
5. No te aha e mea tia ˈi ia imi tatou i te mau taime maitatai no te tamahanahana i te feia e mihi nei?
5 Te parau ra te Koheleta 7:2: “E mea maitai te haere i te fare otoraa, i te haere i te fare amuraa maa.” Mea pinepine, e huru feruriraa maitai aˈe to te hoê taata e oto ra no te faaroo i te Parau a te Atua i te taata o te manaˈo noa i te arearea. E mea tia ia imi tatou paatoa i te mau taime maitatai no te tamahanahana i te feia e mihi nei i te hoê taata here i pohe.