A haere i mua i roto i ta oe taviniraa
1 Mea oaoa na to tatou Metua i te raˈi ia haere ta ˈna mau tavini i mua i te pae varua. Tae noa ˈtu te haereraa i mua no te riro ei taata poro feruriraa paari e te manuïa i te parau apî maitai. Ua faaitoito Paulo i te tiaau ra o Timoteo ia rohi â ia nehenehe te taata atoa e ite i ta ˈna haereraa i mua. (Tim. 1, 4:13-15, MN) E titauhia ia tamata tatou paatoa i te haamaitai i te huru o ta tatou taviniraa, tae noa ˈtu te taata poro aravihi i rotopu ia tatou.
2 A haamau i ta ˈna iho mau fa: E titau te haereraa i mua i te haamauraa i ta ˈna iho mau fa. Eaha vetahi mau fa ta tatou iho e nehenehe e haamau? E nehenehe tatou e tamata i te riro ei mea ite atu â i te faaohipa i ta tatou ˈoˈe pae varua, te Bibilia. (Eph. 6:17) Te vai ra paha te tahi tuhaa o te taviniraa e titauhia ia haamaitai tatou, mai te pororaa na te mau aroâ, na roto i te niuniu paraparau, aore ra i roto i te hoê tuhaa fenua tapihoo. Peneiaˈe e nehenehe tatou e ohipa no te rave i te mau farerei-faahou-raa o te manuïa ˈtu â. Te tahi atu fa maitai roa o te haamaitairaa ïa i to tatou aravihi no te haamata e no te faatere i te mau haapiiraa bibilia.
3 Faanahoraa: Ua faataahia te mau putuputuraa o te amuiraa, te Haapiiraa o te taviniraa teotaratia e te Putuputuraa no te taviniraa iho â râ, no te tauturu ia tatou ia haere i mua ei tavini. E rahi noa ˈtu tatou i te tutava i te faaineine e te apiti i te reira mau putuputuraa e te faaohipa i te mau manaˈo tauturu e horoahia, e mea papu e e rahi noa ˈtu â te mau haamaitairaa ta tatou e fanaˈo.—Kor. 2, 9:6.
4 E titau-atoa-hia ia tauturu tatou te tahi i te tahi ia haere i mua. (Mas. 27:17) E tauturu te faaroo-maitai-raa i te faaiteraa a te feia ta tatou e apiti ra i te pororaa i te haamaitai ia tatou. Hau atu â, e nehenehe te tiaau o ta tatou haapiiraa buka e rave i te tahi faanahoraa ia fanaˈo tatou i te tauturu. Auê ïa haamaitairaa ia tauturu te hoê pionie aravihi aore ra te tahi atu taata poro ia tatou ia aravihi aˈe e ia fanaˈo i te oaoa rahi atu â i roto i te taviniraa! Te vai ra anei te hoê taata poro apî i roto i ta tatou haapiiraa buka? Peneiaˈe e nehenehe tatou e rave i te taahiraa matamua no te titau manihini ia ˈna ia poro na muri ia tatou.
5 Te ohipa faufaa roa ˈˈe e ravehia nei i teie mahana, o te taviniraa Kerisetiano ïa. A pûpû ai tatou na Iehova i ta tatou ‘tusia haamaitai,’ e hinaaro tatou e horoa i te mea maitai roa ˈˈe na ˈna. (Heb. 13:15) Mai te peu e e tutava tatou i te haere i mua i roto i ta tatou ohipa pororaa, e riro tatou ei rave ohipa “aita e haamaraa, e te tia hoi i te tufa i te parau mau.”—Tim. 2, 2:15.