‘Ia faaite outou i te mauruuru’
1 I to Iesu faaoraraa i na lepera hoê ahuru, hoê anaˈe o ratou tei hoˈi i muri no te haamauruuru ia ˈna. Ua ui Iesu: “E ere anei na tino ahuru atoa i tamâhia nei? teihea iho nei râ e tooiva?” (Luka 17:11-19) Auê te faufaa no tatou ia mauruuru e ia faaite i te mauruuru no te mau mea maitatai e te mau mea tia roa ta to tatou Metua horoa noa e te î i te here i te raˈi, te Atua ra o Iehova, i horoa mai no tatou!—Kol. 3:15, MN; Iak. 1:17.
2 Eaha te tahi mau mea e mauruuru ai tatou? Te mauruuru ra tatou no te hoo, te ô rahi roa ˈˈe a te Atua no te huitaata. (Ioa. 3:16) Te mauruuru atoa ra tatou ia Iehova no te faataeraa ia tatou ia ˈna ra. (Ioa. 6:44) To tatou auhoêraa Kerisetiano, o te tahi atu ïa tumu e mauruuru ai tatou. (Sal. 133:1-3) Aita e feaaraa, e nehenehe oe e manaˈo i te tahi atu â ô e rave rahi hohia mai e Iehova. Eita roa ˈtu tatou e hinaaro ia riro mai te mau Iseraela mauruuru ore o tei haamoe i te mau ohipa ta Iehova i rave no ratou!—Sal. 106:12, 13.
3 A faaite i te mauruuru: Noa ˈtu e ua mauruuru iho â paha na lepera hoê ahuru atoa i ta Iesu i rave no ratou, hoê anaˈe tei faaite i to ˈna mauruuru. (Luka 17:15) Oia atoa, e faaite tatou i te mauruuru na roto i te apitiraa ˈtu ma te itoito rahi i te taviniraa. Mai te peu e te mauruuru mau ra tatou no te mau mea atoa ta to tatou Metua î i te here i te raˈi ra i rave, e turaihia ïa to tatou aau ia pee i to ˈna here e huru horoa noa na roto i te paraparauraa no ˈna ia vetahi ê. (Luka 6:45) Ei faahoˈiraa, a paraparau ai tatou no nia i ta Iehova ‘mau ohipa taa ê e to ˈna ra manaˈo ia tatou nei,’ e rahi to tatou here e mauruuru no Iehova.—Sal. 40:5.
4 A faahotu i te mauruuru i roto ia vetahi ê: E mea tia ia imi tatou i te mau ravea no te tauturu i ta tatou mau tamarii e piahi Bibilia ia faahotu i te mauruuru. Te vai ra ta te mau metua e rave rahi ravea no te na reira, mai te taime e mataitai ai ratou e ta ratou mau tamarii i te mau mea ta Iehova i poiete. (Roma 1:20) A faatere ai tatou i te hoê haapiiraa bibilia, e nehenehe tatou e ui atu i ta tatou piahi, “Eaha ta te reira e faaite maira no nia i te huru o Iehova?” A rahi ai te mauruuru o te piahi, e rahi atoa ïa to ˈna here no te Atua e ta ˈna faaotiraa papu i te faaoaoa ia ˈna.
5 I teie mau mahana hopea, e mea rahi te taata tâuˈa ore e te mauruuru ore. (Tim. 2, 3:1, 2) Auê Iehova i te oaoa e ia ite i ta ˈna mau tavini paieti ia faaite i te mauruuru na roto i te apitiraa ˈtu ma te itoito rahi i te taviniraa!—Iak. 1:22-25.