Rata a te Tino aratai

E au mau hoa Ite no Iehova e:

Ua faaohipa te aposetolo Paulo i te mau taime maitatai atoa no te faaite i to ˈna here e to ˈna mauruuru i to ˈna mau hoa Kerisetiano. Ua papai oia i te mau Kerisetiano i Roma e: “E haamaitai na vau i tau Atua, no Iesu Mesia, ia outou atoa na, no te mea, ua parauhia to outou faaroo e ati noa ˈˈe te fenua atoa nei.” (Roma 1:8) Oia, e ati noa ˈˈe te Hau emepera Roma, ua matauhia taua mau Kerisetiano no te senekele matamua ra no to ratou faaroo puai, e ta ratou ohipa pororaa itoito rahi atoa. (Tes. 1, 1:8) No reira Paulo i here roa ˈi i to ˈna mau taeae!

Mai ia Paulo, e haamaitai matou ia Iehova i te mau taime atoa e manaˈo ai matou ia outou. Mea here roa na matou ia outou paatoa! E e nehenehe outou e tiaturi e mea here na Iehova ia outou taitahi. Te faaruru nei vetahi o outou i te patoiraa uˈana, te tamau noa ra râ outou i te poro. Eaha ïa te aau o Iehova i te oaoa no te huru feruriraa itoito e te mǎtaˈu ore ta outou e faaite ra!—Mas. 27:11.

Te horoa ra te Annuaire e rave rahi haapapuraa e e haere Iesu Mesia “ma te haapau atu, e ia pau atu â” e e ore e tupu te mauhaa atoa no te mau pǐpǐ a te Mesia i hamanihia ˈi.—Apo. 6:2; Isa. 54:17.

Ua papai Paulo i te mau Kerisetiano i Philipi e: “Te haamaitai nei au i tau Atua . . . i to outou amui-atoa-raa mai i te evanelia nei.” (Phil. 1:3-5) Tera atoa to matou te mau melo o te Tino aratai manaˈo no outou. I te roaraa o te matahiti taviniraa 2007, e 6 691 790 taata poro tei rave 1 431 761 554 hora i roto i te pororaa i te parau apî maitai i e 236 fenua e ati aˈe te ao nei. E tutavaraa rahi mau â ta outou e rave nei no te haaparare noa i te parau apî maitai! A manaˈo i te mau hanere tausani taata tei farereihia maoti ta tatou mau tutavaraa amui, ia aruehia Iehova!

I te tahi atu taime, ua faaite Paulo e e aumauiui rahi to ˈna i to ˈna mau taeae. Ua papai oia i to Tesalonia e: “Aore [matou i] faaea i te manaˈo i . . . te faaoromai tamau o to outou tiaturi i to tatou Fatu ia Iesu Mesia, i te aro o te Atua o to tatou ra Metua.” (Tes. 1, 1:2, 3) Oia, mea rahi te fifi o te oraraa. E tupu te fifi, e mea faufaa roa râ ia faaoromai tatou. Eaha te mau tautooraa ta outou iho e faaruru nei? Te toaruaru ra anei outou no te mea ua iti roa mai ta outou e nehenehe e rave i roto i te taviniraa a Iehova, no te maˈi rahi? Ua riro anei to outou hoa faaipoipo here e rave rahi matahiti ia hade, te enemi mâha ore roa ˈˈe? (Mas. 30:15, 16) Te imi ra anei outou, e au ra ma te faufaa ore, i te hoê hoa faaipoipo o te here atoa ra ia Iehova mai ia outou a pee maite noa ˈi outou i te aˈoraa bibilia e faaipoipo noa i roto i te Fatu? (Kor. 1, 7:39, MN) Te faaitoito ra anei outou i te aupuru i ta outou mau tamarii i roto i te mau tupuraa fifi roa i te pae faanavairaa faufaa? Noa ˈtu eaha to outou huru tupuraa, ia tuu noa outou i te mau faufaa a te Basileia i te parahiraa matamua, e nehenehe outou e tiaturi e eita Iehova e ‘haamoe i ta outou ohipa i rave e to outou hinaaro i to ˈna ra iˈoa.’ E e, taeae e tuahine ma, eiaha “e rohirohi i te parau maitai”!—Heb. 6:10; Gal. 6:9.

Eaha te tauturu ia outou ia faaoromai? Mai no to Tesalonia, o te “tiaturi [ïa] i to tatou Fatu ia Iesu Mesia.” Ua tano Paulo i te faaauraa i muri aˈe i “te tiaturiraa o te ora” i te hoê taupoo paari o te nehenehe e paruru i te hoê Kerisetiano i te mau manaˈo faatoaruaru e te mau feaaraa tamau.—Tes. 1, 5:8, MN.

Oia mau, na roto i te faaoromairaa ma te oaoa, te horoa nei outou i te hoê pahonoraa i te mau tâhitohitoraa a Satani i roto i te tumu parau rahi o te mana arii o te ao taatoa. Te parau nei Satani e mea miimii iho â te mau tavini a te Atua, e noa ˈtu e ua ineine ratou i te tavini i te Atua no te hoê tau taotiahia, e faataupupu ratou i ta ratou haamoriraa ia uˈana te mau tamataraa aore ra ia vai maoro atu â te faanahoraa o te mau mea i ta ratou i manaˈo. E fanaˈoraa taa ê ta outou e faaite roa e e haavare ino roa te Diabolo! I te mau mahana atoa o to outou oraraa, e piri noa ˈtu â outou i te tupuraa o to outou tiaturiraa.

Mai ia Paulo i farii i te mau taime maitatai no te haapopou i to ˈna mau taeae no to ratou faaroo puai, ta ratou apitiraa horoa noa i te pororaa, e to ratou faaoromai, e farii matou i teie taime maitai no te haapopou ia outou e no te haapapu i to matou here ia outou. A tamau i te rave i te ohipa maitai!

Ia haamaitai-rahi-hia te matahiti e haere maira i te pae varua. Ma te auhoa,

To outou mau taeae,

Tino aratai a te mau Ite no Iehova