A farii manihini atu!
1. Eaha te taime maitai roa no tatou no te poro e no te aha?
1 E taime maitai iho â te tau o te Oroa haamanaˈoraa no te poro. A feruri na: I teie matahiti, te manaˈohia ra e e hau atu i te ahuru mirioni taata te tae mai i te Oroa haamanaˈoraa e te taa i na faaiteraa mau e piti o te here maoti te hoo. (Ioa. 3:16; 15:13) E ite ratou i te mau haamaitairaa ta ratou e nehenehe e fanaˈo maoti ta Iehova ô. (Isa. 65:21-23) Hau atu â, e ere te taeae orero anaˈe te poro. E nehenehe te taatoaraa o te tae mai e horoa i te hoê faaiteraa puai ma te farii manihini i te taata.—Roma 15:7.
2. E nafea ia farii manihini i te taata?
2 No te aha e ore ai e tauaparau i te mau taata na pihai iho ia oe i te haere-noa-raa ˈtu e parahi a tiai ai ia haamata te porotarama? Aita te mau manihini i ite mau i te tereraa o te reira, e taiâ rii iho â ïa ratou. Ia farii atu râ tatou ma te mata ataata e te auhoa, e topa to ratou hau. Ia ite oe i te hoê taata i titau-manihini-hia, e nehenehe oe e ani atu a tahi ra anei o ˈna e haere mai ai i ta tatou mau putuputuraa, aore ra, ua matau anei oia i te tahi melo o te amuiraa. E nehenehe paha oe e haaparahi ia ˈna i pihai iho ia oe no te tauturu atu ia faaohipa i te Bibilia e te buka himene. Mai te peu e tei te Piha a te Basileia outou, a haamataitai poto noa ia ˈna i te reira. I muri aˈe i te oreroraa parau, ia vata oe no te pahono i ta ˈna mau uiraa. Ia titauhia ta oe amuiraa ia faarue oioi, e parau atu paha oe: “Te hinaaro ra vau e ite i to oe manaˈo no nia i tei tupu. E nehenehe anei tâua e farerei faahou?” Ia tae mai te feia aita e poro faahou ra, e hinaaro iho â te mau matahiapo e faaitoito taa ê atu.
3. No te aha mea faufaa ˈi ia tutava i te farii manihini i te taata i te Oroa haamanaˈoraa?
3 No te rahiraa manihini tei tae mai, a tahi ra ratou e ite ai i te oaoa, hau e auhoêraa o te nunaa o Iehova. (Sal. 29:11; Isa. 11:6-9; 65:13, 14) I muri aˈe i teie oroa, eaha ta ratou e haamanaˈo? Tei te huru ïa o ta tatou fariiraa.