E haamanaˈo anaˈe i te hoo ma te mauruuru
1, 2. No te aha tatou e haamanaˈo ai i te hoo ma te mauruuru e tia ˈi?
1 Ei auraroraa i ta Iesu faaueraa, e putuputu te mau Kerisetiano na te ao atoa nei i te Mahana maa 22 no Mati 2008, i muri aˈe i te toparaa mahana, no te haamanaˈo i te pohe o Iesu Mesia. (Luka 22:19; Kor. 1, 11:23-26) Na te mauruuru hohonu no te mau mea atoa i tupu i taua taio mahana ra a 1 975 matahiti aˈenei, e turai ia tatou ia na reira ma te aau tae. Ma te vai taiva ore noa ma te tia roa i roto i te hoê pohe mauiui i nia i te hoê pou haamauiuiraa, ua faaraa Iesu i te iˈoa o to ˈna Metua, a horoa ˈi i te pahonoraa tia roa ˈˈe i te mau faaino a Satani.—Ioba 1:11; Mas. 27:11.
2 Na te toto i haamaniihia o Iesu i haamana i te faufaa apî, a nehenehe atu ai te mau taata tia ore e riro ei tamaiti tavai na te Atua ma te tiaturiraa e faatere e te Mesia i roto i to ˈna Basileia i te raˈi. (Ier. 31:31-34; Mar. 14:24) Hau atu â, mai ta Iesu i faataa ia Nikodemo, ua ite-maitai-hia te hohonu o te here o te Atua no te taata na roto i to ˈna horoaraa mai i ta ˈna Tamaiti here-rahi-hia ei tusia.—Ioa. 3:16.
3. Eaha te fanaˈohia e te feia e tae mai i te Oroa haamanaˈoraa?
3 A titau manihini ia vetahi ê: Ua faahiti Ta tatou taviniraa i te Basileia no Tenuare ia papai i te hoê tapura iˈoa o te feia matauhia e ia farerei roa ia ratou taitahi no te titau manihini atu. Ua haamata anei oe i te titau manihini i te feia o ta oe tapura iˈoa? Te rave ra anei oe i te mau faanahoraa no te apiti roa i te opereraa, o te haamata i te 1 no Mati, no te titau manihini i te taata i te Oroa haamanaˈoraa? E faaroo te feia e tae mai i te haamaramaramaraa o te mau Papai o te nehenehe e patu i te faaroo i te hoo, o te aratai hoi i te ora mure ore ra.—Roma 10:17.
4. No te aha e titauhia ˈi ia tae oioi tatou i te Oroa haamanaˈoraa?
4 Ia faanaho te feia atoa e nehenehe i te tae oioi mai no te farii maitai i te feia o tei farii i te titau-manihini-raa taa ê. No te rahi o te taata e tae mai, e mea faufaa roa no tatou ia haapao maite i te feia tae apî mai e vetahi ê atoa o te haere mai nei i te mau putuputuraa i te tahi taime.
5. E nafea oe e nehenehe ai e faaineine i to oe aau no te reira tupuraa?
5 A faaineine i to oe aau: E nehenehe e itea mai te hoê porotarama taa ê o te taioraa bibilia no te Oroa haamanaˈoraa, o te haamata i te 17 no Mati, i roto i te buka iti E hiˈopoa anaˈe i te mau Papai i te mau mahana atoa—2008 e te Calendrier 2008. E tauturu te hiˈopoaraa i te mau ohipa faufaa i tupu i te mau mahana hopea o te oraraa ei taata o Iesu ia oe ia faaineine i to oe aau no te Oroa haamanaˈoraa. (Eze. 7:10) E faahohonu te feruriruriraa ma te pure i tera mau faatiaraa bibilia i to oe mauruuru no te here o Iehova e o ta ˈna Tamaiti i te horoaraa mai i te hoo.—Sal. 143:5.
6. Eaha te faahopearaa i nia ia tatou ia haapuai tatou i to tatou mauruuru no te hoo?
6 A fatata mai ai te Oroa haamanaˈoraa, ia faaineine maitai ïa tatou ia tatou iho e ia vetahi ê no te reira tupuraa faufaa. E haapaari te haamanaˈoraa i te hoo ma te mauruuru i to tatou taairaa e o Iehova e ta ˈna Tamaiti. (Kor. 2, 5:14, 15) E turai atoa te reira ia tatou ia pee ia raua ma te faaite i te here haapae ia tatou iho ia vetahi ê.—Ioa. 1, 4:11.