A pûpû i te mau vea o te faaite i te parau mau
1. Eaha te tuhaa a Te Pare Tiairaa e Réveillez-vous!?
1 E tuhaa faufaa ta Te Pare Tiairaa e faaite ra i te Basileia o Iehova e Réveillez-vous! i roto i te ohipa pororaa i te Basileia e te faariroraa i te taata ei pǐpǐ. (Mat. 24:14; 28:19, 20) Mea au na tatou e faaite tamau i teie na vea e tae mai i te taime au i roto i te mau tuhaa rau o te taviniraa.
2. Eaha te mau tauiraa i ravehia i nia i Te Pare Tiairaa e Réveillez-vous!, e no te aha?
2 I te roaraa o te mau matahiti, ua ite tatou i te mau tauiraa i roto i te faito rahi e te mau tumu parau o na vea, oia atoa te mau ravea e opere ai tatou i te reira. Ua ravehia tera mau tauiraa ma te fa e faariro i na vea ei mea nehenehe e te au atu â ia faaohipa, ia haaputapû te poroi o te Basileia i te aau o ‘te taata atoa a nehenehe atu ai ratou e ora e e noaa te ite i te parau mau.’—Tim. 1, 2:4.
3. E nafea ia faaohipa i te mau vea i roto i te taviniraa?
3 Mai Tenuare 2006 mai â, ua ite roa tatou i te faaohipa i te mau faaiteraa rau no te opere i te numera taavaˈe o te Réveillez-vous! E na reira atoa tatou i teie nei no te pûpû hoê o na numera taavaˈe e piti o Te Pare Tiairaa e faaite ra i te Basileia o Iehova. Te vai ra te mau hohoˈa faaiteraa no te vea taitahi i te api hopea o Ta tatou taviniraa i te Basileia. I te rahiraa o te taime, e haamataratara te reira hoê o na tumu parau omuaraa o te vea, i te tahi râ taime, o te tahi atu ïa mau tumu parau ta te taata e anaanatae rahi. E faaohipa-maitai-aˈe-hia tera mau faaiteraa mai te peu e ua ite maitai tatou i te tumu parau e haamataratarahia e e faaohipa tatou i ta tatou iho mau taˈo no te faatano i te faaiteraa i nia i ta tatou tuhaa fenua.
4. No te aha e mea maitai ai ia faaohipa i te tahi atu mau faaiteraa, taa ê atu i te mau faaiteraa i roto i Ta tatou taviniraa i te Basileia?
4 Noa ˈtu e e piti faaiteraa no te vea taitahi to roto i Ta tatou taviniraa i te Basileia, e nehenehe oe e faaohipa i te tahi atu faaiteraa. Peneiaˈe e tano atu â te tahi atu tumu parau o te vea i nia i te feia o ta oe tuhaa fenua. Aore ra mea au aˈe na oe e faaite i te hoê tumu parau ta oe e anaanatae roa.
5. Hou a faaineine ai i te hoê faaiteraa no te hoê vea, ia aha oe e tia ˈi?
5 E nafea ia faaineine i ta oe faaiteraa: Na mua roa, ia ite maitai oe i te tumu parau ta oe e maiti i te faaite. Eita paha e mau noa ia oe te tumu parau taitahi o te vea hou a faaohipa ˈtu ai i roto i te taviniraa. E mea tia râ ia faatupu oe i te aau tae e te aau haavare ore ia faaite oe i te mau tumu parau ta oe e maiti. E nehenehe oe e na reira mai te peu noa e ua ite maitai oe i te mau tumu parau ta oe e faaite ra.
6. E nafea ia faaineine i te hoê faaiteraa?
6 I muri iho, a faaau ohie i roto i ta oe mau parau omuaraa. No te haamata i te hoê aparauraa, e nehenehe oe e tuu i te hoê uiraa o te faaara i te anaanatae no nia i te tumu parau. A turui noa i nia i te mana o te Parau a te Atua e haaputapû i te aau. (Heb. 4:12) A maiti i te hoê irava e tano tei taaihia i te tumu parau ta oe i omua, mea maitai aˈe te hoê irava i faahitihia aore ra i papaihia i roto i te tumu parau ta oe e faaite ra. A feruri e nafea ia faatuati i te irava e te tumu parau.
7. E nafea ia haamaitai i ta tatou mau faaiteraa?
7 I te mau taime atoa: Ia manuïa maitai te hoê faaiteraa, e mea tia ia faaohipahia te reira. A apiti i te opereraa i te mau vea i te Mahana maa e ta oe amuiraa. A pûpû atu i te feia tei farii ê na i te tahi atu mau papai. A pûpû noa i te mau vea i ta oe mau piahi Bibilia e i te tahi atu mau taata ta oe paha i farerei i to oe hoˈiraa ˈtu. E nehenehe atoa oe e vaiiho i te mau vea na te feia ta oe e paraparau i te fare toa, i roto i to oe mau tere, aore ra a tiai ai oe i te taote. A haamaitai i ta oe mau faaiteraa a faaohipa ˈi oe i te reira i te roaraa o te avaˈe.
8. E nafea e mea otahi ai Te Pare Tiairaa e Réveillez-vous!?
8 E vea otahi Te Pare Tiairaa e Réveillez-vous! Te faateitei ra te reira ia Iehova ei Arii o te ao taatoa. (Ohi. 4:24) E tamahanahana te reira i te taata i te parau apî maitai o te Basileia o te Atua e e faaitoito ia ratou ia faahotu i te faaroo ia Iesu Mesia. (Mat. 24:14; Ohi. 10:43) Te pee maite atoa ra te reira i te mau tupuraa i te ao nei o te faatupu ra i te mau parau tohu bibilia. (Mat. 25:13) A tauturu i te taata o ta oe tuhaa fenua ia fanaˈo i teie na vea ma te faaineine i te pûpû atu i te mau taime tano atoa!
9. E nafea ia faaineine i te hoê farerei-faahou-raa?
9 Ia vaiiho oe i te hoê vea, aore ra ia paraparau noa oe ma te auhoa e te hoê taata i te hoê tumu parau pae varua, a faaineine i te hoê uiraa aore ra te hoê parau o te haaferuri no te haamau i te hoê farerei-faahou-raa e te tahi atu aparauraa pae varua. Mai te peu e mea itoito rahi tatou i te ueue i te huero o te parau mau, e nehenehe tatou e tiaturi e e haamahora Iehova i te aau o te feia e hinaaro mau ra e ite e e tavini ia ˈNa.—Kor. 1, 3:6.