A haere mai ta te feia paari ra
1 A ani ai Iesu i na taata ravaai e maha ia riro ei pǐpǐ na ˈna, aita ratou i faataere i te pahono, tera râ, “i reira ra . . . ua pee atura ia ˈna.” (Mat. 4:18-22) Oia atoa, a taui ai o Saulo no Tareso e a araara ˈi to ˈna mata i muri aˈe, aita o ˈna i haamarirau tera râ “ua parau atura oia ia Iesu Mesia i reira ra, i roto i te mau sunago ra.” (Ohi. 9:20) Te hemo tamau noa ra te tau; ua mairi anaˈe, ua ore ïa e a muri noa ˈtu. Te tumu ïa e mea faufaa ˈi no tatou ia ‘haere mai ta te feia [paari] ra’ ma te haapao e nafea tatou e faaohipa ˈi i to tatou taime.—Eph. 5:15, 16; MN.
2 Tupuraa manaˈo-ore-hia: E nehenehe te mau taime maitatai ta tatou e fanaˈo ra i teie mahana no te tavini ia Iehova e mou ê ananahi. (Iak. 4:14) Eita hoê aˈe taata e nehenehe e ape i te “tupuraa manaˈo-ore-hia.” (Koh. 9:11, MN) Hau atu â, e ruau tatou paatoa, e i roto i teie nei faanahoraa o te mau mea, eita tatou e nehenehe e ape i te “mau mahana ino” o te au maitai i te matahiti rahi e o te taotia i ta tatou e nehenehe e rave i roto i te taviniraa ia Iehova. (Koh. 12:1) No reira, e ere i te haerea paari ia faataime i te pûpûraa na te Atua aore ra ia tiai i te mau tupuraa taa ê hou a faarahi ai i ta tatou taviniraa i nia i te tuhaa rahi roa ˈˈe e nehenehe. (Luka 9:59-62) Ua itea ia Aberahama te hau i to ˈna mau mahana hopea, a pohe atu ai ‘ua ruhiruhia roa e ua rahi roa to ˈna matahiti’ no te mea ua faaohipa oia i to ˈna oraraa ma te paari, ma te pûpû-taatoa-hia na Iehova.—Gen. 25:8.
3 Te poto nei te taime: E hinaaro atoa tatou e haamâuˈa i to tatou taime ma te paari no te mea “te poto nei te taime.” (Kor. 1, 7:29-31) Ua fatata roa teie faanahoraa tahito o te mau mea i te hope i teie nei. E hope te mau taime maitatai no te haa i roto i te haaputuputuraa rahi i te feia e au i te mamoe i te roaraa o te ‘auhune o te fenua.’ (Apo. 14:15) E mea tia ia haapao maitai tatou eiaha ia vaiiho i te mau peapea e te mau faaanaanataeraa o te oraraa ia rave ê i te taime ta tatou e nehenehe e faaohipa maitai aˈe i roto i te taviniraa. (Luka 21:34, 35) Mea oaoa mau â ia hiˈo tatou i te haaraa faufaa ta tatou i vaiiho i muri i te tau auhune!
4 E mea tia ia ara tamau tatou ia nehenehe tatou ia ohipa i roto i te mau tuhaa taa ê oaoa o te taviniraa e vai mai i mua ia tatou. E faaoti papu anaˈe i te rave i ta tatou atoa e nehenehe no te tavini ia Iehova “oi vai aˈe te ao.” (Heb. 3:13) Ia na reira tatou, e faaite tatou e mea paari mau tatou, no te mea “o tei haapao . . . i to te Atua ra hinaaro, e tia ïa i te oraraa e a muri noa ˈtu.”—Ioa. 1, 2:17.