E parau tatou ia vetahi ê i to tatou tiaturiraa i te Basileia
1 I teie mau mahana hopea ati nei, aita e tiaturiraa to e rave rahi taata i roto i te ao nei. (Eph. 2:12) Ma te paari ore, ua tuu vetahi i to ratou tiaturi i nia i te taoˈa rahi materia, te mau faatere taata, te ihi no teie tau, e te tahi atu â. Auê tatou i te oaoa, e tiaturiraa mau to tatou no a muri aˈe, hoê tiaturiraa e “[tutau no te nephe], e te mahiti ore, e te mau maitai”!—Heb. 6:19; MN.
2 I raro aˈe i te faatereraa a te Basileia o te Atua, e faarirohia te fenua ei paradaiso. E tia faahou mai te feia herehia. (Ohi. 24:15) Aita faahou te veve, te parau-tia ore, te maˈi, te ruhiruhiaraa, e te pohe. (Sal. 9:18; Mat. 12:20, 21; Apo. 21:3, 4) Te tahi noa teie o te mau parau fafau a Iehova e fatata i te tupu. Teihea tuhaa o to tatou tiaturiraa ta oe e tiai taa ê nei?
3 A faaite i te parau apî maitai: Eiaha tatou e tapea i te tiaturiraa i te Basileia na tatou noa. E turai te here i te Atua e i to tatou taata-tupu ia tatou ia pee i te hiˈoraa o Iesu e ia “poro haere i te parau maitai i te taata rii, . . . ei faaora i te feia aau oto, ei poro haere i te ora no te tîtî, e ia hiˈo faahou te matapo, e ei tuu hoi i te feia i paruparu.” (Luka 4:18) Ua poro te aposetolo Paulo i te parau apî maitai i te matete e i te mau vahi atoa tei reira te taata. Ua ohipa hua oia i roto i te taviniraa. (Ohi. 18:5) Ma te pee i to ˈna hiˈoraa ei taata poro itoito rahi i roto i te taviniraa, e paruru tatou ia tatou iho i “te haapaoraa i te peu o teie nei ao, e te haavare o te taoˈa” ia haapoiri i to tatou tiaturiraa Kerisetiano.—Mar. 4:19.
4 Eita to tatou tiaturiraa i te Basileia e marehu ia farerei tatou i te taata o te tâuˈa ore mai, o te faaite i te hoê anaanatae iti roa no te poroi o te Basileia, aore ra o te patoi mai ia tatou ia hiˈohia. “Ia papu maite to tatou mauraa i ta tatou parau, ma te aueue ore.” (Heb. 10:23) Aore hoi tatou “i haama i te evanelia.” (Roma 1:16) E turai paha to tatou tiaturi e tuutuu ore papu ia vetahi ia faaroo mai.
5 Noa ˈtu e e huti tatou i te ara-maite-raa i nia i te mau huru tupuraa o te ao e ino noa ˈtura o te faatupu i te parau tohu bibilia, e ere tatou i te feia poro i te ino. Ua niuhia râ ta tatou pororaa i nia i to tatou tiaturiraa—te parau apî maitai o te Basileia o te Atua. Ia poro tatou i teie parau apî maitai ma te tiaturi papu e te itoito rahi e tia ˈi, “ia noaa te tiai ite papu e tae noa ˈtu i te hopea ra.”—Heb. 6:11.