Te mau tauiraa anaanatae o Te Pare Tiairaa!
1 I te omuaraa o teie matahiti, ua fanaˈo te mau amuiraa i te hoê parau faaite anaanatae: Mai Tenuare 2008 atu, e piti neneiraa taa ê te ravehia no Te Pare Tiairaa, hoê no te taatoaraa e te tahi no to tatou huitaeae Kerisetiano ïa! Peneiaˈe ua ui paha oe: ‘E nafea teie na vea e taa ê ai? Eaha te mau maitai i te fanaˈoraa e piti neneiraa taa ê? Te vai ra anei te mau mea apî i roto?’
2 Te mau taa-ê-raa: E parauhia te vea o te 1 o te avaˈe te Neneiraa no te taatoaraa. E faaineinehia te mau tumu parau atoa o teie vea ma te manaˈo i te huiraatira. E parauhia te vea o te 15 o te avaˈe te Neneiraa no te haapiiraa e eita e operehia i roto i te taviniraa. I roto e vai ai te mau tumu parau atoa no te haapiiraa e hinaarohia no te avaˈe hoê e tae noa ˈtu i te mau tumu parau hau faufaa roa no te mau Kerisetiano pûpûhia. Eita te Neneiraa no te taatoaraa o Te Pare Tiairaa e auhia e te mau Ite noa, e au-taa-ê-hia râ e te feia e ere i te Ite o te farii ra paha i te Bibilia. Area te Réveillez-vous! ra, no te mau huru taata atoa ïa, tae noa ˈtu te feia feaa e te feia e parau ra e te turu ra ratou i te hoê haapaoraa e ere i te Kerisetiano.
3 Te mau maitai: I roto i te Neneiraa no te haapiiraa, e ere ïa i te mea faufaa faahou ia faataa i te mau taˈo mai “pionie” ia nehenehe te feia e ere i te Ite ia taa i te auraa. E nehenehe atoa e itehia i roto i teie vea te mau haamaramaramaraa tano faaineine-taa-ê-hia no te mau Ite no Iehova e te mau piahi Bibilia o te haere ra i mua i te pae varua. Eaha ïa no te Neneiraa no te taatoaraa? I te mea e no te huiraatira te mau tumu parau e te huru papairaa, e au te feia e ere i te Ite i te taioraa i te taatoaraa o te vea. Oia mau, e fanaˈo te Ite no Iehova taitahi i te taioraa i te mau vea atoa. No te mea e e pûpû tatou hoê noa Pare Tiairaa e hoê Réveillez-vous! i roto i te taviniraa i te mau avaˈe atoa, e avaˈe taatoa ïa ta tatou no te faaohipa i te mau faaiteraa tano.
4 Te mau mea apî: Ua faanahohia te tahi mau mea apî anaanatae no te Neneiraa no te taatoaraa o Te Pare Tiairaa. E faataa te hoê tuhaa i te mau haapiiraa tumu o te mau Papai na roto i te hoê huru aparauraa ohie roa. E faaite te tahi atu e nafea te Bibilia e nehenehe ai e tauturu i te mau utuafare. E pûpûhia te mau tumu parau haapiiraa bibilia na te feia apî. I roto i te vea taitahi, e haamahitihiti te hoê tumu parau i te mau irava bibilia taa ê o te haapii ia tatou no nia i te mau huru maitatai o Iehova.
5 Te pure nei matou ia haamaitai Iehova i teie faanahoraa apî o Te Pare Tiairaa. Ia ite ïa e rave rahi atu â taata i te parau apî maitai maoti tera vea, e te Réveillez-vous!—Mat. 10:11.