“E ao to te taata e faaoromai i te ati”
1 E faaruru te mau Kerisetiano atoa i te mau ati. (Tim. 2, 3:12) E fa mai paha te mau tamataraa na roto i te mau maˈi, te mau fifi i te pae moni, te mau faahemaraa, te hamani-ino-raa aore ra na roto i te tahi atu ravea e rave rahi. No te tapeapea rii ia tatou, no te turai ia tatou ia faaiti mai i ta tatou taviniraa Kerisetiano, aore ra no te tapea roa ia tatou ia ore e tavini i te Atua, te tumu ïa o te mau ati ta Satani e tairi ra i nia ia tatou. (Ioba 1:9-11) E nafea te faaoromairaa i te ati e aratai ai i te oaoa?—Pet. 2, 2:9.
2 A faaineine ia oe no te mau tamataraa: Ua horoa mai Iehova i ta ˈna Parau mau e tae noa ˈtu i te faatiaraa o to Iesu oraraa e ta ˈna mau haapiiraa. Na roto i te faarooraa i ta Iesu mau parau e te raveraa i te reira, e haamau tatou i te hoê niu paari a faaineine atu ai no te mau tamataraa. (Luka 6:47-49) E noaa atoa ia tatou te puai na roto i te tahi atu mau tauturu—to tatou mau taeae Kerisetiano, te mau putuputuraa a te amuiraa, e te mau papai niuhia i nia i te Bibilia no ǒ mai i te pǔpǔ o te tavini haapao maitai e te paari. E faaohipa pinepine tatou i te ô a te Atua, te pure.—Mat. 6:13.
3 Ua horoa atoa mai Iehova i te hoê tiaturiraa na tatou. Ia patu tatou i te hoê faaroo puai i ta Iehova mau parau fafau, e riro mai to tatou tiaturiraa ei “[tutau no te nephe], e te mahiti ore, e te mau maitai.” (Heb. 6:19; MN) I te mau tau bibilia, eita roa te mau pahi e faarue i te uahu ma te tutau ore, i te mau mahana maitai atoa. Ia tupu taue mai te hoê vero, e nehenehe te tuuraa i te tutau e tapea i te pahi ia ore ia iri i nia i te aau. Oia atoa, e tapea papu te paturaa i te faaroo i nia i ta te Atua mau parau fafau i teie nei ia tatou ia tupu mai te mau vero o te mau fifi. E nehenehe te mau ati e tupu taue mai. Noa ˈtu e i te omuaraa ua farii-maitai-hia te ohipa pororaa a Paulo raua Baranaba i Lusetera, ua taui oioi te tupuraa i to te feia patoi ati Iuda taeraa mai.—Ohi. 14:8-19.
4 E hopoi mai te faaoromai i te oaoa: E horoa mai te tamauraa i te poro noa ˈtu te patoiraa i te hau o te feruriraa. E oaoa tatou i te mea no te iˈoa o te Mesia i manaˈohia ˈi e au ia tatou te hamani-ino-raa. (Ohi. 5:40, 41) E tauturu te faarururaa i te mau tamataraa ia tatou ia faahotu rahi atu â i te mau huru maitatai o te haehaa, te auraro, e te faaoromai. (Deut. 8:16; Heb. 5:8; Iak. 1:2, 3) E haapii mai te reira ia tatou ia tiaturi ia Iehova, ia tiaturi i ta ˈna mau parau fafau, e ia imi i te tauturu ia ˈna ra.—Mas. 18:10.
5 Ua ite tatou e e mea iti poto te mau ati. (Kor. 2, 4:17, 18) E ravea te mau tamataraa no te faaite i te hohonu o to tatou here no Iehova. Ma te faaoromai i te reira, e nehenehe atoa tatou e pahono i ta Satani mau faahaparaa. No reira, eiaha e tuu! “E ao to te taata e faaoromai i te ati, ua tia-anaˈe-hia mai hoi oia ra, e roaa ïa ia ˈna te korona ora.”—Iak. 1:12.