Te oaoa nei tatou i te haa i roto i te taviniraa a Iehova!
1 Ua oaoa te aposetolo Paulo i ‘te faahope i to ˈna puai’ no te rave i ta ˈna taviniraa Kerisetiano. (Kor. 2, 12:15) I teie mahana atoa, mea rahi te Kerisetiano e haa maite nei ei pionie. Te faataa ra te tahi atu e hopoia utuafare teimaha ta ratou, i te taime i roto i ta ratou porotarama î maitai no te poro i te mau hebedoma atoa. Te faaohipa ra vetahi mea maˈimaˈi roa hoi i to ratou itoito iti no te paturu i te mau faufaa a te Basileia. Mea faaitoito mau â ia ite i te nunaa o Iehova, aita e hiˈoraa i te faito matahiti aore ra te tupuraa, ia haa i roto i te taviniraa a Iehova!
2 Here i te taata-tupu: Ma te rave i ta tatou atoa e nehenehe e rave i roto i te taviniraa a Iehova, a haapapu ai i to tatou here ia ˈna e i te taata-tupu, e fanaˈo tatou i te hoê manaˈo haava viivii ore. No te mea ua horoa Paulo ia ˈna iho i roto i te faaiteraa i te parau apî maitai, ua nehenehe oia e parau ma te oaoa e: “E parau hua ˈtu na vau ia outou i teie nei mahana, aore roa o ˈu viivii i te toto o te taata atoa nei.” (Ohi. 20:24, 26; Tes. 1, 2:8) Ia apiti tatou i te taviniraa ia au i to tatou huru tupuraa, eita ïa tatou e roohia i te hara toto.—Ezek. 3:18-21.
3 E ite tatou i te oaoa ia haa tatou no te tauturu ia vetahi ê. (Ohi. 20:35, MN) Ua parau te hoê taeae e: “Ia po, e ia hoˈi au i te fare i muri aˈe i te hoê mahana taatoa i roto i te taviniraa a Iehova, ua rohirohi iho â vau. Mea oaoa râ vau, e e haamauruuru vau ia Iehova no te horoaraa mai i te oaoa aita e taata e tia ia faaore.”
4 Here i te Atua: Te tumu faufaa roa ˈˈe e haa ˈi tatou i roto i te taviniraa a Iehova, oia ïa e mauruuru to tatou Metua i te raˈi. E turai te here i te Atua ia tatou ia haapao i ta ˈna mau faaueraa, no nia atoa i te pororaa e te faariroraa i te taata ei pǐpǐ. (Ioa. 1, 5:3) Ia tâuˈa ore aore ra ia patoi mai te taata, e tamau tatou ma te oaoa i te haa puai no Iehova.
5 E ere teie i te taime no te haamarirau. Te ora nei tatou i te tau auhune. (Mat. 9:37) E pinepine te hoê taata faaapu i te ooti e rave rahi hora i te maoro i te tau auhune, aita hoi i rahi to ˈna taime no te haaputu i te maa hou te reira a haamata ˈi i te ino. Aita atoa i rahi te taime no te auhune pae varua. Ma te haamanaˈo i te tau ta tatou e ora nei, ia tamau ïa tatou paatoa i te faaitoito i roto i te taviniraa.—Luka 13:24; Kor. 1, 7:29-31.