‘Ia rahi noa to oe hotu’
1 Ua faahohoˈa taipe Iesu ia ˈna iho i te vine mau, to ˈna Metua i te Faaapu, e ta ˈna mau pǐpǐ faatavaihia i te varua i te mau amaa hotu o te vine. A faataa ˈi oia i te ohipa a te Faaapu taipe, ua haamahitihiti Iesu i te faufaaraa ia ati maite noa i te vine. (Ioa. 15:1-4) Te haapiiraa, oia ïa e mea titauhia ia riro te taatoaraa e taairaa piri to ratou e o Iehova, mai te hoê amaa hotu o te “vine mau” ra o Iesu Mesia. E titauhia ia tamau noa tatou i te faatupu rahi i “te hotu a te varua” e te hotu a te Basileia.—Gal. 5:22, 23, MN; Mat. 24:14; 28:19, 20.
2 Hotu a te varua: E nehenehe ta tatou haereraa i mua i te pae varua e faitohia ia au i te rahi o ta tatou faaiteraa i te hotu a te varua. Te tutava ra anei oe i te atuatu i te hotu a te varua moˈa o te Atua ma te haapii e te feruriruri tamau i te Parau a te Atua? (Phil. 1:9-11) Eiaha e taiâ i te pure no te ani i te varua moˈa, o te nehenehe e faahotu i roto ia oe i te mau huru maitatai o te faahanahana ia Iehova e o te tauturu ia oe ia haere noa i mua i te pae varua.—Luka 11:13; Ioa. 13:35.
3 Maoti atoa te atuaturaa i te hotu a te varua e riro ai tatou ei tavini itoito rahi atu â. Ei hiˈoraa, e turai te here e te faaroo ia tatou ia faataa i te taime i roto i ta tatou porotarama î maitai no te apiti tamau i te taviniraa. E tauturu te mau huru maitatai mai te hau, te faaoromai, te aau maitai, te mǎrû, e te hitahita ore ia tatou ia hamani maitai i te feia patoi. Maoti te oaoa e ite ai tatou i te mauruuru i roto i te taviniraa ia ore atoa te taata e farii mai.
4 Hotu a te Basileia: E hinaaro atoa tatou e faatupu i te hotu a te Basileia. Te vai ra te pûpûraa i ‘te tusia haamaitai, oia hoi ta te vaha nei, i te haamaitairaa i to Iehova iˈoa.’ (Heb. 13:15) E na reira tatou na roto i te faaiteraa ma te tuutuu ore e te itoito rahi i te parau apî maitai. Te tutava ra anei oe i te faatupu atu â i te hotu a te Basileia ma te haamaitai i ta oe iho taviniraa?
5 Ua faaite Iesu e e ere hoê â rahiraa hotu ta ta ˈna mau pǐpǐ haapao maitai e faatupu. (Mat. 13:23) No reira, eiaha tatou e faaau ia tatou iho ia vetahi ê, e horoa râ tatou i te mea maitai roa ˈˈe na Iehova. (Gal. 6:4) Maoti te hoê hiˈopoaraa haavare ore i to tatou iho huru tupuraa ia au i te Parau a te Atua, e nehenehe tatou e tamau i te faahanahana ia Iehova ma te ‘faarahi i to tatou hotu.’—Ioa. 15:8.