Pahonoraa i ta outou mau uiraa

◼ E nafea ia omua i te himene haamataraa o te Haapiiraa o te taviniraa teotaratia, te Putuputuraa no te taviniraa, te Putuputuraa no te taatoaraa, e te Haapiiraa o Te Pare Tiairaa, e na vai?

Ua papaihia te mau himene haamataraa maitihia no te hebedoma taitahi o te Haapiiraa no te taviniraa teotaratia i nia i te porotarama no te Haapiiraa o te taviniraa teotaratia, te api hau o Ta tatou taviniraa i te Basileia no Atopa. Ua faataahia te mau himene haamataraa e faaotiraa no te Putuputuraa no te taviniraa o te hebedoma taitahi i te api 2 o Ta tatou taviniraa i te Basileia. Oia atoa te mau himene no te Haapiiraa o Te Pare Tiairaa tahebedoma, tei te api 2 ïa o te vea taitahi. E tuhaa te mau himene i maitihia o te putuputuraa taatoa i taaihia ˈi te reira e e mea tia ïa ia omuahia mai e te taeae e aratai ra i te putuputuraa eiaha râ e te taeae i peretiteni i to na mua ˈtu putuputuraa.

Ei hiˈoraa, e manava te tiaau no te Haapiiraa o te taviniraa teotaratia i te feia e faaroo ra, e omua mai i te himene haamataraa, e aratai i te haapiiraa, e i muri iho e ani i te taeae orero matamua o te Putuputuraa no te taviniraa ia haere mai i nia i te tahua. O te taeae na ˈna te tuhaa o te Putuputuraa no te taviniraa te titauhia ia omua mai i te himene e haamata i te Putuputuraa no te taviniraa.

Oia atoa, na te taeae o te peretiteni i te Putuputuraa no te taatoaraa e omua mai. E farii mahanahana oia i te taatoaraa i tae mai e e ani oia ia ratou ia apiti mai i te himene haamataraa i maitihia e te taeae orero. Na te taeae e peretiteni ra (aore ra paha na te tahi atu taeae aravihi i maiti-oioi-hia) e omua mai i te putuputuraa na roto i te pure. E faaite mai oia i te taeae orero e e faahiti oia i te manaˈo tumu o ta ˈna oreroraa parau. I muri aˈe i te oreroraa, e haamauruuru poto noa te taeae e peretiteni ra no te haapiiraa, eita râ oia e haapoto i ta te taeae orero i parau noa ˈtura. E faaite oia i te upoo parau o te oreroraa parau no te taatoaraa no te hebedoma i mua, e e ani oia i te taatoaraa i tae mai ia faaea mai no te Haapiiraa o Te Pare Tiairaa. Aita e titauhia ra ia ani te taeae e peretiteni ra mai te peu e e hinaaro te feia e faaroo ra e faatae atu i te tapao no te here e no te aroha i te amuiraa a te taeae orero ratere. I muri aˈe, e ani te taeae e peretiteni ra i te taeae aratai i te Haapiiraa o Te Pare Tiairaa ia haere mai i nia i te tahua.

E omua mai te taeae aratai i te Haapiiraa o Te Pare Tiairaa i te himene matamua tei taaihia i te haapiiraa. E aratai oia i te haapiiraa ia au i te mau faaueraa i neneihia e i muri iho e faaite oia i te himene faaotiraa. E pinepine e ani te taeae aratai i te Haapiiraa o Te Pare Tiairaa i te taeae i horoa i te oreroraa parau no te taatoaraa ia faaoti na roto i te pure.

E tauturu te haapaoraa i teie mau faaueraa rarahi ia papu e te arataihia ra te mau putuputuraa a ta tatou amuiraa ma te tahoêhia.