“Ia parau i te parau a te Atua ma te mǎtaˈu ore”
1 I te tahi taime e haamarirau anei oe i te faaite roa i to oe faaroo mai te peu e e nehenehe ta oe i te fare haapiiraa aore ra i te ohipa? E mea fifi anei no oe ia horoa i te faaiteraa ma te faanaho ore i te fetii e te feia tapiri aore ra i te taata aita paha oe i matau? Eaha te nehenehe e tauturu ia tatou taitahi ia faaohipa i te mau taime maitatai no te “parau i te parau [a te Atua] ma te mǎtaˈu ore”?—Phil. 1:14, MN.
2 Eiaha e haamarirau i te paraparau: E haamarirau anei oe i te paruru i te hoê hoa piri roa aore ra te hoê fetii o te pari-haavare-hia ra? Ua faahape-roa-hia o Iehova, to tatou Hoa rahi roa ˈˈe i te roaraa o te mau senekele. E fanaˈoraa taa ê ta tatou e horoa i te hoê faaiteraa no to tatou Atua rahi! (Isa. 43:10-12) E nehenehe te here hohonu ia Iehova e tauturu ia tatou ia faaruru i to tatou haama aore ra to tatou mǎtaˈu ore e e nehenehe e turai ia tatou ia paraparau roa ˈtu, eiaha ia haamarirau i te faaite i te parau mau ma te itoito rahi.—Ohi. 4:26, 29, 31.
3 A haamanaˈo e e parau apî maitai ta tatou poroi. E hopoi mai te reira i te haamaitairaa maoro i te feia e imi ra i te reira. Ia haamau tatou i te feruriraa i nia i te faufaaraa o te pororaa e eiaha i nia ia tatou iho aore ra i te feia e patoi maira, e nehenehe tatou e poro ma te itoito.
4 Te mau hiˈoraa maitatai: E nehenehe tatou e itoitohia i te haerea taiva ore o te feia i parau i te parau ma te mǎtaˈu ore. Inaha, ua faaite o Enoha ma te itoito i te mau haavaraa a Iehova i nia i te feia hara paieti ore. (Iuda 14, 15) Ua poro o Noa ma te taiva ore i te mau taata o te tâuˈa ore ra. (Mat. 24:37-39) No te mau Kerisetiano o te senekele matamua, “e pue taata haapii-ore-hia raua e te itea ore,” ua tamau ratou i ta ratou pororaa noa ˈtu te patoiraa uˈana. (Ohi. 4:13, 18-20) I te tahi taime, te vai ra i roto i te Tour de Garde e te Réveillez-vous! te mau aamu o te mau Ite, maoti to ratou faaroo ia Iehova, ua nehenehe ratou e faaruru i te mǎtaˈu i te taata e i te riro ei feia poro itoito rahi.
5 E itoitohia tatou ia haapao i te oraraa o te mau tavini taiva ore o te tau tahito o tei faaruru i te mau tupuraa fifi. (Arii 1, 19:2, 3; Mar. 14:66-71) Ua ‘itoito â ratou i to tatou Atua’ e ua paraparau ma te mǎtaˈu ore. E nehenehe atoa ïa ta tatou!—Tes. 1, 2:2.