Rata a te Tino aratai

MA TE pee i te hiˈoraa o Iesu, te pure nei tatou ma te haavare ore i te Atua: “Ia raa to oe iˈoa.” E itehia to tatou hinaaro puai e ora ia au i tera pure na roto i te huru e ora ˈi tatou i to tatou oraraa ei Ite no Iehova. Oia mau, e titauhia ˈtu â i te ite-noa-raa tatou i te iˈoa o te Atua. E mea tia ia faaohipa tatou i te mau ravea maitatai atoa no te faahanahana i tera iˈoa. Oia mau, te haamaitairaa rahi roa ˈˈe ta tatou e nehenehe e fanaˈo o te parauraahia ïa tatou e e Ite no Iehova.—Mat. 6:9; Isa. 43:10.

Ia au i te Salamo 110:3, te rave nei te nunaa o Iehova ma te aau tae i te ohipa ta Iehova i faaue e rave. No te aha te mau taata o te faito matahiti e no te huru oraraa atoa e horoa ˈi ia ratou iho i roto i te ohipa pororaa? Na mua roa, no to ratou ïa here i te Atua e to ratou iho paieti ia ˈna. Te faaue ra te Deuteronomi 6:5, 6 (MN) ia tatou ia here ia Iehova ma ‘to tatou aau, to tatou [nephe] e to tatou puai atoa.’ E turai teie here ma te aau atoa ia tatou ia faaohipa i to tatou taime, puai, e ta tatou faufaa no te faahaere i te mau faufaa a te Basileia o te Atua i mua, na roto atoa i te apiti-hua-raa i te taviniraa ia au i to tatou tupuraa.

No te here o Iehova i te huitaata i faaue ai oia ia faaitehia te parau apî maitai o to ˈna Basileia e ati aˈe te fenua. Aita o ˈna e hinaaro ra ia pohe te hoê ia tatarahapa râ te taata atoa i to ratou haerea faaroo ore e ia fariu i to ratou Atua Poiete ra ia ora ratou. (Pet. 2, 3:9) Te parau ra Iehova e: “Aore roa o ˈu e mauruururaa i te pohe o te taata ino ra; ia fariu mairâ te taata i ta ˈna parau ino ia ora.” (Ezek. 33:11) Ia poro tatou, e haapapuraa ite mata tatou o te here o Iehova i to tatou taata-tupu. Ma te feaa ore, e tumu hoê tera tupuraa o te oaoa e te mauruuru ta tatou e ite nei ia apiti tatou i teie ohipa faufaa.

E ite-atoa-hia to tatou here hohonu no Iehova i roto i ta tatou huru hiˈoraa i ta ˈna Parau faauruhia, te mau Papai Moˈa. Aita anaˈe te Bibilia, eita tatou e ite i te Atua e e haafatata ˈtu ia ˈna, mai ta te Iakobo 4:8 e titau manihini ra ia tatou. Eita atoa tatou e ite no te aha tatou e parahi ai i te fenua nei e eaha te tupu a muri aˈe. Eita tatou e ite e o to tatou tupuna ra o Adamu te tumu o to tatou mau fifi. (Roma 5:12) Eita atoa tatou e ite i te here rahi o te Atua i te horoaraa mai i ta ˈna Tamaiti fanau tahi ei hoo no tatou. Na roto i te tahi atu ravea e rave rahi, te tufa ra Iehova i te hoê faito o to ˈna ite, paari, e maramarama na tatou. E nafea tatou e haafaufaa ˈi i te ô ta ˈna i horoa mai, ta ˈna Parau faaurua e to ˈna varua! E turai to tatou mauruuru no teie ô faahiahia ia tatou ia “faaherehere maite i te taime” no te taio, haapii, e feruriruri i ta ˈna mau parau. (Eph. 5:15, 16; Sal. 1:1-3) Eita ïa tatou e nounou i te taime e horoahia no te taio i te Parau a te Atua i te mau mahana atoa. E turai râ to tatou here no te Atua ia tatou ia haafatata i ta ˈna Parau, a nehenehe ai tatou e faarahi i to tatou maramarama ia ˈna e e faahohonu i to tatou here ia ˈna.

Ua haapii tatou maoti te Bibilia e i to Adamu hararaa ia Iehova, ua tuu o ˈna i to ˈna huaai atoa no a muri aˈe, e tae noa ˈtu ia tatou taitahi, i roto i te hoê tupuraa ino e te hepohepo. Ua nehenehe râ te Atua e horoa i te hoê ravea na te huitaata, ma te rave i te mau taahiraa no te haapapu e e tupu ta ˈna opuaraa no nia i teie fenua.—Gen. 3:15.

Ma te feaa ore e hinaaro puai to tatou atoa e faaraa i te iˈoa faahiahia o to tatou Atua. A rahi ai to tatou ite i te huru faahiahia o te Atua ra o Iehova, e turaihia tatou ia ohipa amui e o ˈna e ta ˈna faanahonahoraa i te faaiteraa i to ˈna iˈoa e ta ˈna opuaraa nehenehe. Ua papu ia tatou e tei ia tatou ra ta ˈna farii maitai e haamaitairaa i teie nei e te hoê oraraa mure ore a muri aˈe i roto i te ao apî.

Te hinaaro nei matou te mau melo o te Tino aratai e haapapu atu i to matou here ia outou e te mau taeae e tuahine here e. Te hinaaro atoa nei matou e faaite i to matou mauruuru hohonu no ta outou mau tutavaraa tuutuu ore e faaohipa i te taime e toe ra hou “te ati rahi” no te faaite i te parau apî maitai i te taata e rave rahi. (Apo. 7:14) Ma te na reira, e horoa outou na ratou i te hoê â ravea maitai e ta oe i fanaˈo, o te fanaˈoraa ïa i te ite i te Atua e i te Mesia o te aratai i te ora mure ore.—Ioa. 17:3.

To outou mau taeae,

Te Tino aratai a te mau Ite no Iehova