E nehenehe te taatoaraa e faariro i te taata ei pǐpǐ apî
1 E ere te hoê pǐpǐ apî i te faahopearaa o te mau tutavaraa a te hoê noa taata poro. E nehenehe o Iehova e faaohipa i to ˈna mau “hoa rave ohipa” atoa no te tauturu i te mau piahi Bibilia ia haere i mua i te pae varua. (Kor. 1, 3:6-9) E tauturu tatou taitahi i te feia tae apî mai eiaha noa na roto i ta tatou mau pahonoraa haavare ore i te mau putuputuraa Kerisetiano na roto atoa râ i to tatou haerea maitai, o te haapapu mau ra i te ohiparaa a te varua o te Atua i roto i to tatou oraraa. (Ioa. 13:35; Gal. 5:22, 23; Eph. 4:22, 23) Eaha ˈtu â te nehenehe e rave no te tauturu i te feia tae apî mai?
2 Ei amuiraa: E nehenehe tatou paatoa e faaite i te anaanatae i te feia o te haamata i te haere mai i te mau putuputuraa ma te haere atu e aroha ia ratou ma te mahanahana e ma te paraparau ia ratou hou e i muri aˈe i te putuputuraa. A haamanaˈo ai oia i to ˈna apiti-matamua-raa ˈtu i te amuiraa, teie ta te hoê taata i parau: “Mea rahi aˈe te taata î i te here mau, e taata ěê ratou, ta ˈu i farerei hoê noa mahana i ta ˈu i farerei i roto i te ekalesia i reira to ˈu paariraa. Ua papu roa ia ˈu e ua itea mai ia ˈu te parau mau.” Ua bapetizohia oia e hitu avaˈe i muri aˈe i to ˈna haere-matamua-raa i te putuputuraa.
3 A haapopou mau i te hoê piahi Bibilia a haere ai oia i mua i te pae varua. Te faaû ra anei oia i te patoiraa? Te haere tamau ra anei oia i te mau putuputuraa? Ua faaitoito anei oia i te horoa i te pahonoraa? Ua tapao anei oia i to ˈna iˈoa i te Haapiiraa o te taviniraa teotaratia aore ra ua haamata anei oia i te poro? A haapopou ia ˈna no to ˈna haereraa i mua. E tamahanahana e e faaitoito te reira ia ˈna.—Mas. 25:11.
4 Ei taata faatere i te haapiiraa bibilia: Ua nehenehe te tahi mau taata poro e tauturu i ta ratou mau piahi Bibilia ia matau i te melo taitahi o te amuiraa ma te ani i te tahi atu feia poro hiˈoraa maitai ia haere e rave i te haapiiraa na muri ia ratou. A titau manihini oioi i te piahi i te mau putuputuraa a te amuiraa mai te peu e e nehenehe. Ia haamata oia i te haere i te mau putuputuraa, a tutava i te faaite ia ˈna i te tahi atu. E mea fifi anei no ˈna ia faaore i te hoê peu ino, mai te puhipuhiraa i te avaava? Te vai ra anei te tahi melo i roto i to ˈna utuafare o te patoi ra i ta ˈna haapiiraa? E nehenehe oia e tauturuhia ma te paraparau i te hoê taata poro o te faaû ra e o te faaruru ra i te hoê â fifi.—Pet. 1, 5:9.
5 E hinaaro te taata tae apî mai i te turu pae varua no roto i te amuiraa. E nehenehe te taata atoa e tauturu ia ratou ia haere i mua ma te faaite i to ratou anaanatae mau.