A pee i te Orometua Rahi a faaohipa ˈi i te buka Bibilia haapii
1. Mea nafea to Iesu haapiiraa?
1 Ua faataa noa te Orometua Rahi o Iesu i te mau mea ma te ohie e te maramarama. No te faaaraara i te feruriraa o te feia e faaroo ra ia ˈna, i te tahi taime ua ani na mua o ˈna ia ratou i to ratou manaˈo. (Mat. 17:24-27) Ua huti oia i te ara-maite-raa i nia i te Parau a te Atua. (Mat. 26:31; Mar. 7:6) Ua haapao o ˈna eiaha e horoa rahi roa i te haamaramaramaraa na ta ˈna mau pǐpǐ, ma te ite e e tamau â ratou i te haapii. (Ioa. 16:12) Ua anaanatae atoa o Iesu e ua tiaturi anei aore ra ua taa anei ta ˈna mau pǐpǐ i ta ˈna i haapii ia ratou. (Mat. 13:51) Ua neneihia te buka Bibilia haapii no te tauturu ia tatou ia haapii mai tera atoa.
2. I roto i teihea huru e nehenehe ai oe e faaohipa i te mau uiraa faaomuaraa no te pene taitahi?
2 Te mau uiraa faaomuaraa: Ia haamata oe i te hoê pene, e mea maitai ia huti oe i te ara-maite-raa i nia i te mau uiraa faaomuaraa i raro aˈe i te upoo parau. A taio i te mau uiraa haaferuri no te faaaraara i te hinaaro o te piahi. Aore ra e nehenehe oe e ani ia ˈna ia horoa poto i to ˈna manaˈo. Aita e faufaa ia tatara huˈahuˈa i to ˈna mau manaˈo aore ra ia faatitiaifaro i te mau parau hape atoa. E nehenehe noa oe e haamauruuru ia ˈna no to ˈna mau manaˈo e e haamata i te hiˈopoa i te tumu parau. E tauturu ta ˈna mau faataaraa o te uiraa faaomuaraa ia oe ia ite mai te peu e e titauhia ia haapao hau atu â oe i te tahi tuhaa o te haapiiraa.
3. E nafea tatou e nehenehe ai e faaohie noa i te haapiiraa?
3 Te mau irava: E mea tia ia haamauhia te haapiiraa i nia i te mau Papai. (Heb. 4:12) Tera râ, aita e titauhia ia taio i te taatoaraa o te mau irava i faahitihia. A haamahitihiti i te mau irava i reira te niuraahia ta tatou mau tiaturiraa. Aita e titauhia ia taio i te mau irava o te horoa mai i te tahi mau haamaramaramaraa. Te faaite ra te buka Bibilia haapii i te parau mau ma te fifi ore. A faaohie noa i te haapiiraa. A feruri i te mau tuhaa faufaa, e a ape i te hinaaro e paraparau rahi roa no nia i te mau manaˈo huˈahuˈa aore ra e faaô ma te faufaa ore i te hoê tumu parau.
4. Na te aha e faataa e mea tia anei ia rave tatou i te taime i te roaraa o te haapiiraa no te hiˈopoa i te haamaramaramaraa i roto i te tuhaa hau?
4 Te tuhaa hau: Te vai ra 14 tumu parau hau no nia i te mau haapiiraa i roto i te tuhaa hau. E nehenehe oe e maiti e tauaparau aore ra eita i teie mau tumu parau i te roaraa o te haapiiraa. No nia i te tahi mau tumu parau e maiti paha oe i te faaitoito i ta oe piahi ia taio o ˈna iho i te tuhaa hau, mai te peu iho â râ e te taa ra ia ˈna e te farii ra i te haamaramaramaraa i roto i te tumu parau matamua. Ei hiˈoraa, mai te peu e te tiaturi aˈena ra te piahi e o Iesu te Mesia, e ere ïa i te mea faufaa ia hiˈopoa e o ˈna i te tumu parau “Iesu—te Mesia fafauhia” ia tauaparauhia te pene 4, “O vai o Iesu Mesia?” I te tahi atu taime, e mea maitai ia rave i te taime i te roaraa o te haapiiraa no te tauaparau i te tuhaa hau aore ra i te tahi tuhaa iti.
5. Ia maiti tatou i te hiˈopoa i te tahi mau haamaramaramaraa o te tuhaa hau, e nafea ïa tatou e rave ai i te reira?
5 Ia maiti oe i te tauaparau i te tuhaa hau, e faaineine oioi paha oe i te mau uiraa e e hiˈopoa i te mau paratarafa e te piahi mai ta oe e na reira ra no te tumu parau faufaa. Aore ra, ia au i te mau hinaaro o te piahi, e maiti paha oe i te rave tau minuti i te roaraa o te haapiiraa no te hiˈo faahou i te haamaramaramaraa e o ˈna. E nehenehe ïa te reira e haapapu ia oe e te taa ra ia ˈna i te tumu parau ta ˈna iho e taio ra.
6. E nafea te haamanaˈoraa tarenihia i te hopearaa o te haapiiraa atoa e nehenehe ai e faaohipahia?
6 Te haamanaˈoraa tarenihia: E horoa te tumu parau tarenihia i te hopearaa o te mau pene atoa i te mau parau o te pahono pinepine i te mau uiraa faaomuaraa. Ia faaoti oe i te haapiiraa, e nehenehe oe e faaohipa i tera mau parau no te hiˈo faahou i te mau tuhaa faufaa o te pene. Ua itea mai i te tahi feia poro e e tauturu te taioraa i te mau parau atoa e peneiaˈe te mau irava atoa i te piahi. E e ani ratou i te piahi ia faataa poto e nafea te mau irava e haapapu ai i tera parau. E faaite te reira i te orometua haapii e te taa ra anei i te piahi i te mau tuhaa faufaa o te haapiiraa e e nafea te reira i te tururaahia e te Bibilia e mai te peu e te farii ra oia i te reira. E faaineine atoa te reira i te piahi ia faaohipa i te Bibilia no te faataa i te parau mau i te tahi atu.
7. E nafea tatou ia faaohipa i te buka Bibilia haapii no te rave i ta tatou ohipa?
7 Te ravea manuïa roa ˈˈe no te rave i ta tatou ohipa e haapii i te taata e e faariro i te taata ei pǐpǐ, o te peeraa ïa i te mau raveraa haapiiraa a Iesu. (Mat. 28:19, 20) E nehenehe te buka Bibilia haapii e tauturu ia tatou ia na reira. A faaohipa maitai i te reira no te haapii ia vetahi ê i te parau mau ma te maramarama; te ohie e te anaanatae.