A faaite hua i te mau maitai o Iehova
1. Eaha te turai ia tatou ia faaite hua i te mau maitai o Iehova?
1 “Tei ia oe, e Iehova, te rahi, e te mana, e te hanahana, e te pau, e te tura, to nia i te raˈi ra, e to nia i te fenua, na oe anaˈe ïa.” (Par. 1, 29:11) E turai to tatou here e to tatou mauruuru ia Iehova ia tatou ia aha? Ia ‘faaite hua i to ˈna [mau] maitai, tei parau ia outou i to roto i te pouri, ia tae i to ˈna ra maramarama umerehia.’ (Pet. 1, 2:9) Eita tatou e nehenehe e faaea i te paraparau i te tahi atu no nia i to tatou Atua rahi! E ravea maitai ta tatou no te faaite hua i te mau maitai o Iehova i te mau avaˈe Mati, Eperera e Me.
2. Eaha te opereraa taa ê tei faataahia no te faaara i te Oroa haamanaˈoraa, e o vai te nehenehe e apiti atu?
2 Opereraa taa ê o te titau-manihini-raa no te Oroa haamanaˈoraa: I te Monire 2 no Eperera, e haafaufaa tatou i te mau maitai o Iehova ma te faatupu i te Amuraa maa ahiahi a te Fatu. E operehia te mau titau-manihini-raa no tera tupuraa faufaa na te ao nei mai te 17 no Mati e tae atu i te 2 no Eperera. Te faaitoitohia nei tatou atoa ia apiti roa i tera opereraa. E ravea faahiahia te reira no te feia o te faaî ra i te mau tupuraa titauhia no te haamata i te faaite i te parau apî maitai. Mai te peu e te faaî ra te mau taata e haapii ra i te Bibilia na muri ia oe aore ra ta oe mau tamarii i te mau titauraa, a haere e parau i te mau matahiapo o te amuiraa.
3. Eaha ta tatou e nehenehe e parau no te titau-manihini-raa i te mau taata i te Oroa haamanaˈoraa?
3 Hoê â teie opereraa e i tei tupu no te mau tairururaa mataeinaa “Faaoraraa fatata!” E operehia ta te mau amuiraa ia navai ia nehenehe e horoahia ˈtu e 50 na te taata poro taitahi e 150 na te pionie taitahi. A rave i te hoê faaiteraa poto, ma te parau ei hiˈoraa: “Teie ta oe titau-manihini-raa no te hoê tupuraa tamatahiti faufaa o te fatata i te tupu. E oaoaraa ia farii ia oe. To nia iho i te api te mau haamaramaramaraa atoa.” Parau mau, mai te peu e e ui mai te taata i te mau uiraa, e rave tatou i te taime no te pahono atu. E nehenehe te manaˈo tumu no nia i te Amuraa maa a te Fatu i roto i te tuhaa hau o te buka Bibilia haapii (te mau api 206 e to muri iho) e tauturu ia tatou. I te hopea hebedoma, e pûpû atu tatou i te titau-manihini-raa e te mau vea. E papai anaˈe i te anaanatae atoa i faaitehia e e rave anaˈe i te mau faanahoraa no te hoˈi-faahou-raa.
4. Mea nafea te mau titau-manihini-raa taa ê i te Oroa haamanaˈoraa ia operehia?
4 Mai te peu e e nehenehe, e vaiiho atu tatou i teie titau-manihini-raa i te taata e au. A papai atoa i te feia aita to te fare e a ara i te hoˈi faahou i te tahi atu taime. E nehenehe te amuiraa te toe ra ta ratou e rave rahi titau-manihini-raa e vaiiho i te reira i te feia aita to te fare i te hebedoma na mua noa ˈˈe i te Oroa haamanaˈoraa eiaha râ na mua roa ˈtu. Ia papu ia oe e e tae atoa ˈtu te titau-manihini-raa a te feia ta oe e farerei faahou, te feia e haapii ra na muri ia oe, to oe fetii, to oe mau hoa ohipa, te feia tapiri mai i ǒ oe e te tahi atu feia ta oe i matau.
5. No te aha e mea tia ˈi ia faanaho tatou i teie nei no te rave i te taviniraa pionie tauturu?
5 Te taviniraa pionie tauturu: E nehenehe anei ta oe e faaite hau atu â i te mau maitai o Iehova ma te rave i te taviniraa pionie tauturu i te avaˈe Mati, Eperera aore ra Me? Mea papu e e titau te reira i te hoê faanaho-faahou-raa o ta oe porotarama o te mau mahana atoa. (Eph. 5:15-17) Ia papu râ ia oe e ia tutava oe i te ohipa hau i roto i te taviniraa ia Iehova, e oaoahia oe e e haamaitaihia oe. (Mas. 10:22) A fatata mai ai te Oroa haamanaˈoraa, teie te taime no te haamata i te faanaho.—Mas. 21:5.
6. Eaha te haapiiraa ta tatou e nehenehe e huti i te hiˈoraa o te hoê tuahine e 90 matahiti o tei riro ei pionie tauturu i te matahiti i mairi aˈenei?
6 I te matahiti i mairi aˈenei, ua tamata te hoê tuahine e 90 matahiti i te taviniraa pionie tauturu. “Noa ˈtu e mea au roa na ˈu e faaapu, e noa ˈtu e hinaaro vau e haamata i te ueue, ta ˈna ïa e parau ra, ua taa ia ˈu e mea tia ia tapea vau i te mea faufaa no ˈu. I te mea e ua hinaaro vau e tuu i te mau hinaaro o te Basileia i te parahiraa matamua, ua faaoti au e riro ei pionie tauturu i Mati.” Ua haamaitaihia anei ta ˈna mau tutavaraa? “E mea fatata roa ˈtu vau i te amuiraa, ta ˈna ïa e faataa ra, e mea fatata roa ˈtu ia Iehova atoa.” E nehenehe atoa anei tatou e hiˈopoa i ta tatou mau fa matamua e e rave i te mau tauiuiraa e hinaarohia?
7. E mea fifi anei ia tavini ei pionie tauturu?
7 Peneiaˈe e manaˈo oe e e ere i te mea fifi ia naea e 50 hora no te taviniraa pionie tauturu. A feruri i ta oe mau ohipa o te mau mahana atoa na roto i te pure, a haamau i te hoê porotarama, e a papai te reira i nia i ta oe tarena teotaratia. O oe te mea ite roa ˈˈe i to oe iho tupuraa. Mai te peu e mea maˈimaˈi oe e te ere ra oe i te puai, peneiaˈe e nehenehe oe e poro e piti hora i te mau mahana atoa. Mai te peu e te rave ra oe i te ohipa i te mahana taatoa aore ra te haere ra oe i te haapiiraa, e nehenehe paha oe e rave i te taviniraa pionie tauturu i te mau ahiahi aore ra i te mau hopea hebedoma.
8. Maoti te aha i rave ai nau hoa faaipoipo i te taviniraa pionie?
8 E rave rahi o tei rave i te taviniraa pionie tauturu ei utuafare. I te mau matahiti na mua ˈtu ua taiâ nau hoa faaipoipo i te rave i te taviniraa pionie tauturu no to raua manaˈoraa e eita e nehenehe no to raua mau huru tupuraa. Eaha ïa ta raua i rave? “Ua pure mâua ia Iehova ia tauturu ia mâua ia rave i ta mâua e hinaaro ra e rave amui e mea maoro.” Ma te faanaho maitai ua naea ta raua fa. Te parau faahou ra raua: “E mea faahiahia mau. Ua fanaˈo mâua e rave rahi haamaitairaa. Mai te peu e te vai ra ta mâua aˈoraa e horoa ˈtu teie ïa: a tamata ˈtu! Mai te peu e ua manuïa mâua, e mea papu e e nehenehe atoa ta oe.”
9. Eaha ta oe e nehenehe e rave i te roaraa o ta oe haapiiraa utuafare i mua no te faaineine no te ohipa taa ê o te mau avaˈe e fatata maira?
9 No te aha e ore ai e faataa i te tahi taime i te roaraa o ta oe haapiiraa utuafare i mua no te paraparau i te huru e nehenehe ai te melo taitahi o te utuafare e faarahi i ta ˈna ohipa i te roaraa o te avaˈe i mua? Noa ˈtu e eita te taatoaraa e nehenehe e tavini ei pionie tauturu, peneiaˈe e nehenehe te hoê melo o to oe utuafare e na reira ma te tauturu e te ohipa amui a te tahi atu mau melo. Mai te peu e eita e nehenehe, e nehenehe to oe utuafare e haamau i te mau fa e horoa hau atu â i te taime i roto i te taviniraa i te roaraa o tera mau avaˈe taa ê ohiparaa.
10. No te aha e mea tia ˈi ia paraparau tatou i te tahi atu no nia i to tatou hinaaro e rave hau i te roaraa o teie tau o te Oroa haamanaˈoraa?
10 E tauturu te tahi i te tahi: E maˈi pee te anaanatae. A paraparau no nia i to oe hinaaro e rave i te taviniraa pionie tauturu. E nehenehe ïa oe e faaitoito i te tahi atu ia na reira. Hau atu â, e nehenehe paha te feia o tei rave i te taviniraa pionie i mutaa ihora e horoa na oe i te mau manaˈo tauturu ia faanaho oe a naea ˈtu ai ta oe fa. (Mas. 15:22) Mai te peu e e nehenehe oe e rave i te taviniraa pionie tauturu, no te aha e ore ai e titau manihini i te tahi atu taata poro, peneiaˈe te hoê taata hoê â tupuraa e to oe, ia apiti mai ia oe no tera ohipa au?
11. E nafea te mau matahiapo e nehenehe ai e faatupu i te anaanatae no te taviniraa pionie tauturu i te mau avaˈe e fatata maira?
11 E rave rahi matahiapo o te rave i te faanahoraa hinaarohia no te apiti i teie huru taa ê o te taviniraa. (Heb. 13:7) E faaitoito mau te reira i te mau amuiraa! E faatupu atoa te mau matahiapo i te anaanatae na roto i ta ratou mau tauaparauraa e te tahi atu. E nehenehe te tahi mau parau faaitoitoraa aore ra te tahi mau manaˈo tauturu tano e navai no te turai i te tahi feia poro ia rave i te taviniraa pionie tauturu. E faanaho atoa te tiaau no te taviniraa i te mau putuputuraa hau no te pororaa a nehenehe atu ai te taatoaraa o te feia poro e apiti atu ei pûpû, i muri aˈe atoa i te ohipa aore ra te haapiiraa. E faaara-tamau-hia tera mau faanahoraa. E haapapu atoa oia e e mea navai te tuhaa fenua e te mau papai a te taatoaraa.
12. Eaha paha ta oe e nehenehe e rave mai te peu e eita ta oe e nehenehe e rave i te taviniraa pionie tauturu?
12 Noa ˈtu e e tapea te mau tupuraa ia oe ia rave i te taviniraa pionie tauturu, e nehenehe oe e faaitoito i te feia e rave ra i te reira, e e pure no ratou. (Mas. 25:11; Kol. 4:12) Peneiaˈe e nehenehe tatou e rave i te mau faanahoraa no te poro e o ratou i te hoê mahana hau i te hopea hebedoma aore ra e faaea maoro atu i ta tatou i matau i te rave.
13. Eaha te fa i haamauhia i Tahiti, e e nafea ta oe amuiraa e nehenehe ai e ohipa ia naea te reira?
13 Te fa a te mau 300 pionie tauturu i Eperera: E 292 te numera teitei roa o te mau pionie tauturu i Tahiti; ua naea te reira i Mati 2002. No reira, e tano ïa te fa e 300 pionie tauturu i Eperera i mua. No te reira e navai ïa ia rave 1 taata poro i nia i te 6 i roto i te amuiraa taitahi. Parau mau, i roto i te tahi mau amuiraa, mea rahi atu â te taata poro te nehenehe e rave i te taviniraa pionie tauturu. E nehenehe te rahiraa o te mau amuiraa e na reira. A feruri na i te anaanatae i roto i te amuiraa e te mau huru maitatai i nia i te ohipa pororaa i roto i te tuhaa fenua!
14. No te aha e avaˈe maitai roa ˈi o Eperera no te taviniraa pionie tauturu?
14 No te aha e avaˈe maitai ai o Eperera no te taviniraa pionie tauturu? E tupu te Oroa haamanaˈoraa i te omuaraa o te avaˈe, e horoa rahi mai ïa te reira i te taime no te hoˈi faahou e hiˈo i te mau taata o te apiti atu. Hau atu â, e pûpû tatou i te mau vea, ma te fa e vaiiho i te buka Bibilia haapii i te mau farerei-faahou-raa apî e ia haamata i te mau haapiiraa bibilia. Ma te riroraa ei pionie tauturu i tera avaˈe, e noaa ïa ia tatou te mau ravea maitatai e rave rahi no te haamata i te mau haapiiraa bibilia. Te vai ra e pae Tapati e hoê mahana faaearaa ohipa i Eperera, e faaohie ïa te reira i te mau mea no te feia e pionie ratou ma te ohipa aore ra ma te haere i te haapiiraa.
15. No te aha e mea titauhia ˈi ia ohipa tatou a fatata ˈi te Oroa haamanaˈoraa?
15 I te mau matahiti atoa, e haafatata te Oroa haamanaˈoraa o te mahemo ia tatou i te hopearaa o teie faanahoraa o te mau mea. Ua iti te taime e toe ra no te paraparau i te tahi atu no nia i to tatou Atua rahi. (Kor. 1, 7:29) Ua hope anaˈe te tau o te Oroa haamanaˈoraa, e ore te ravea maitai faufaa roa i horoahia mai ia tatou e arue i to tatou Metua i te raˈi. E faaineine anaˈe ïa ia tatou i teie nei no te rave i te mau mea atoa ta tatou e nehenehe i Mati, Eperera e Me no te faaite hua i te mau maitai o Iehova!
[Tumu parau tarenihia i te api 4]
E nehenehe anei e naea ia tatou e 300 pionie tauturu i Eperera?
◼ A faataa i te mea faufaa roa no oe
◼ A tauaparau i te mau fa ei utuafare
◼ A tauaparau i te tahi atu no nia i ta oe mau opuaraa