E nafea ia faaineine i te hoê faaiteraa vea
1. No te aha e mea maitai aˈe ai ia faaineine i ta tatou iho faaiteraa vea eiaha râ e tamau aau noa i te hoê hohoˈa i roto i Ta tatou taviniraa i te Basileia?
1 ‘No te aha e mea tia ˈi ia faaineine tatou i te mau faaiteraa vea,’ ta oe paha e uiui, ‘i te mea e te vai ra te mau faaiteraa i roto i Ta tatou taviniraa i te Basileia taitahi?’ Noa ˈtu e e rave rahi o tei ite e e tauturu teie mau hohoˈa faaiteraa, e titauhia iho â ia faaineine. Eita paha te hoê faaiteraa o te manuïa i roto i te hoê tuhaa fenua e tano i roto i te tahi atu. No reira, aita tatou e titauhia ra ia pûpû i te mau vea na roto roa i te mau parau o te hohoˈa faaiteraa. Noa ˈtu e e maiti tatou i te faaohipa i te hoê hohoˈa faaiteraa, e mea maitai roa ˈˈe ia faahiti tatou i ta tatou iho mau parau.
2. Eaha te titauhia no te faataa teihea tumu parau te haamahitihiti?
2 A maiti i te hoê tumu parau: I muri aˈe i te taioraa i te vea, a maiti i te hoê tumu parau e tano i ta oe tuhaa fenua e o ta oe i au iho â. E turai paha to oe tiaturi papu e anaanatae i te fatu fare ia hinaaro e taio atoa i te reira. E haamahitihiti paha oe i te hoê tumu parau o te anaanatae-rahi-hia i roto i te tuhaa fenua, a taio atoa râ i te tahi atu mau tumu parau o te vea. I reira, e nehenehe oe e faatano i ta oe faaiteraa ia farerei oe i te hoê taata o te anaanatae roa i te tahi atu tumu parau.
3. Eaha te huru omuaraa parau ta oe e faaohipa no te mau faahopearaa maitai roa ˈˈe?
3 A ui i te hoê uiraa: I muri iho, a faaineine i ta oe omuaraa parau. E mea faufaa te reira. E nehenehe te uiraa i te hoê uiraa haaferuri i te fatu fare e faaara i to ˈna anaanatae i te tumu parau ta oe i maiti i te haamahitihiti. E pinepine te mau uiraa manaˈo i te manuïa roa ˈˈe. A ape i te ui i te tahi mea o te faahuru ê aore ra o te turai i te fatu fare ia mârô.
4. Eaha te mau haamaitairaa ia taio i te hoê irava i te fatu fare ia au i te tupuraa?
4 A taio i te hoê irava: I te pae hopea, a maiti i te hoê irava no te taio atu ia au i te tupuraa o te fatu fare, peneiaˈe te vai ra hoê i roto i te tumu parau ta oe e haamahitihiti. E tauturu ïa te taioraa ˈtu i te hoê irava i te fatu fare ia ite e no roto mai ta tatou poroi i te Parau a te Atua. (Tes. 1, 2:13) E horoa atoa te irava ia ˈna i te hoê faaiteraa noa ˈtu e eita oia e rave i te vea. Ua faaara vetahi i te anaanatae o te fatu fare ma te taio i te hoê irava hou a ui ai i te hoê uiraa taa maitai. E nehenehe oe e omua i te irava ma te parau, “E hinaaro vau e ite i to oe manaˈo i nia i tei parauhia i roto i teie irava.” E a huti i te ara-maite-raa o te taata i nia i te hoê tuhaa e tano i roto i te vea e e tatara poto noa no te faaara ˈtu â i to ˈna anaanatae hou a pûpû atu ai i te reira.
5. Eaha te aratairaa tumu e titauhia ia haamanaˈo oe ia faaineine oe i te hoê faaiteraa vea?
5 Aita e ture etaeta no nia i te parau ia pûpû i te mau vea. E pinepine, e mea maitai roa ˈˈe ia faaohie e ia haapoto atu. A faaohipa i te hoê tauaparauraa e tano ia oe e o te faatupu i te faahopearaa maitai. A haamahitihiti i te faufaaraa maitai o te mau vea, e a faaite i te aau tae. Ia faaineine maitai oe ia oe, e pûpû oe i Te Pare Tiairaa e te Réveillez-vous! ma te manuïa roa i te feia “[aau farii e tano] no te ora mure ore.”—Ohi. 13:48; MN.