E pee anaˈe i to tatou “Atua oaoa” ra o Iehova
1 Te hinaaro mau ra Iehova ia oaoa te taata. Te faaite atea ra ta ˈna Parau ia tatou i te mau haamaitairaa faahiahia ta ˈna i faaineine no te huitaata. (Isa. 65:21-25) E mea tia ia ite-maitai-hia e vetahi ê e te oaoa ra tatou i te tufaraa i “te evanelia hanahana o te Atua [oaoa]” na ratou. (Tim. 1, 1:11; MN) E mea tia ia faaite ta tatou huru paraparau i te poroi o te Basileia i to tatou hinaaro i te parau mau e to tatou anaanatae mau i te taata ta tatou e paraparau ra.—Roma 1:14-16.
2 E parau mau e i te tahi mau taime e tautooraa ia tapea noa i te hoê feruriraa oaoa. I roto i te tahi mau tuhaa fenua, te ite ra tatou e mea iti te taata e farii maitai ra i te poroi o te Basileia. Te vai ra paha te mau taime e faaû tatou i te mau tupuraa fifi i roto i to tatou iho oraraa. No te tapea noa i te hoê feruriraa oaoa, e mea maitai ia haamanaˈo e mea faufaa roa ia faaroo e ia taa te feia o ta tatou tuhaa fenua i te parau apî maitai o te Basileia ta tatou e poro nei. (Roma 10:13, 14, 17) E tauturu te feruriruriraa i te reira ia tatou ia tamau i te faaite atu ma te oaoa i te mau faanahoraa aroha hamani maitai a Iehova no te ora.
3 Haamauraa i te feruriraa i nia i te mau mea maitatai: E mea tia ia ara maite atoa tatou i ta tatou e parau atu. Noa ˈtu e e haamata paha tatou i te aparau ma te faahiti i te hoê fifi aore ra te hoê parau apî ta te taata e haamanaˈo ra, eiaha tatou e haamaoro i nia i te mau mea faatoaruaru. Ta tatou ohipa, o te hopoiraa ïa i “te parau oaoa e te maitai ra.” (Isa. 52:7; Roma 10:15) E poroi teie parau oaoa i niuhia i nia i te mau parau fafau a te Atua o te hoê oraraa oaoa. (Pet. 2, 3:13) Ma te haamanaˈo i te reira, a faaohipa i te mau Papai no te ‘faaora i te feia aau oto.’ (Isa. 61:1, 2) Na te reira e tauturu ia tatou ia oaoa e ia tapea i te hoê feruriraa maitai.
4 E tapao iho â te taata i to tatou huru oaoa a apiti ai tatou i te ohipa pororaa. E faaite noa anaˈe ïa i te huru o to tatou “Atua oaoa” ra o Iehova a tufa ˈi tatou i te parau apî maitai na te taata i roto i ta tatou tuhaa fenua.