A faatupu i te mauruuru no te mau huru maitatai faito ore o Iehova
1 I roto i ta tatou taviniraa, eita noa tatou e haapii ia vetahi ê i te pue parau mau tumu bibilia. E tauturu tatou i te taata ia ite ia Iehova mai te hoê ihotaata e ia faatupu i te mauruuru no to ˈna mau huru maitatai faito ore. Ia ite te feia aau haavare ore i te parau mau no nia i te Atua, e ohipa roa te reira i nia ia ratou a turai atu ai ia ratou ia rave i te mau tauiraa i roto i to ratou oraraa ‘ia au to ratou haerea ia Iehova i te mau mea atoa e mauruuru ai oia ra.’—Kol. 1:9, 10; 3:9, 10.
2 Ta tatou buka haapiiraa apî: I te omuaraa iho, te huti ra te buka Bibilia haapii i te ara-maite-raa i nia i to Iehova mau huru maitatai. Te pahono ra te pene matamua iho â i te mau uiraa: Te tapitapi mau ra anei te Atua ia outou?, Mai te aha te huru o te Atua?, e E nehenehe anei e haafatata ˈtu i te Atua? Te haamataratara atoa ra tera pene i te moˈaraa o Iehova (par. 10), ta ˈna parau-tia e to ˈna aumihi (par. 11), to ˈna aroha (par. 13), to ˈna mana (par. 16), e to ˈna huru aroha noa, hamani maitai rahi, ineine i te faaore i te hapa, faaoromai, e to ˈna taiva ore (par. 19). Teie ta te paratarafa 20 e haapoto ra i te parau: “A haapii noa ˈtu â ˈi outou no nia ia Iehova, e papu atu â ia outou e te vai mau ra oia e e rahi atu â te tumu e here ai outou ia ˈna e e haafatata ˈtu ai ia ˈna.”
3 E nafea tatou e nehenehe ai e faaohipa i te buka Bibilia haapii no te tauturu i te mau piahi Bibilia ia haafatata ˈtu ia Iehova? I muri aˈe i te hiˈopoaraa i te hoê paratarafa o te haamataratara ra hoê o te mau huru maitatai o te Atua, e nehenehe tatou e ui i te piahi, “Eaha ta te reira e faaite ra no nia i te huru o Iehova?” aore ra “E nafea te reira e faaite ai i to te Atua anaanatae ia oe iho?” Ma te faaohipa i te tahi mau taime i tera mau uiraa i te roaraa o te haapiiraa, e haapii tatou i ta tatou mau piahi ia feruriruri i ta ratou e haapii nei e tauturu atu ai ia faatupu i te mauruuru no te mau huru maitatai faito ore o Iehova.
4 A faaohipa i te mau tumu parau haamanaˈoraa tarenihia: I te hopea o te pene taitahi, a ani i te piahi ia tatara mai na roto i ta ˈna iho mau parau i te manaˈo faufaa taitahi o te tumu parau tarenihia “Ta te Bibilia e haapii ra.” A huti i te ara-maite-raa i nia i te mau irava i faahitihia. No te faaitoito i te piahi ia faaite eaha to roto i to ˈna aau, e nehenehe oe e ui i te tahi mau taime, “Eaha to oe huru aau i mua i ta te Bibilia e haapii ra i nia i teie manaˈo?” I te na reiraraa, eita noa oe e haamahitihiti i te mau manaˈo faufaa roa o te pene e haroaroa maitai atoa râ oe i ta te piahi e tiaturi mau ra. E tauturu te reira i te piahi ia haamata i te faatupu i te hoê taairaa e o Iehova.