E faaite anaˈe i te anaanatae mau—ma te haapopou atu
1 E faaitoito te haapopouraa haavare ore i te taata, e turai te reira ia ratou ia haa, e e faaoaoa ia ratou. E rave rahi taata poro tei ite e e tauturu pinepine te hoê haapopouraa poto haavare ore i te taata ia faaroo mai i roto i te taviniraa. E nafea tatou e nehenehe ai e haapopou i te taata a tutava ˈi tatou i te faaite ia ratou i te parau apî maitai?
2 A hiˈo maite: Ua tapao Iesu Mesia tei faahanahanahia i te ohipa maitai a na amuiraa e hitu i Asia Iti. (Apo. 2:2, 3, 13, 19; 3:8) Oia atoa, e turai te anaanatae mau i te mau taata ta tatou e farerei i roto i te taviniraa ia tatou ia imi i te mau taime maitatai no te haapopou atu. Ei hiˈoraa, te hoê aua atuatu-maitai-hia, te hoê metua e aroha ra i ta ˈna tamarii, aore ra te hoê fatu fare e ataata ra e e aroha ra i te taata atoa ma te auhoa, e taime maitatai anaˈe ïa no te haapopou. Te ineine ra anei oe i te hiˈo maite e i te faaohipa i tera mau taime maitatai?
3 A riro ei taata faaroo maitai: Ia poro oe ia vetahi ê, a titau manihini ia ratou ia faaite i to ratou manaˈo ma te ui atu i te mau uiraa tano. A faatura ia ratou ma te haapao maitai atu i ta ratou e parau mai. (Roma 12:10) E itea paha ia oe te tahi mea o ta oe e nehenehe e haapopou ma te haavare ore, a tia ˈtu ai ia oe ia patu i nia i te manaˈo ta oe e farii.
4 A faaohipa i te haroaroaraa: E nafea tatou ia parau mai te fatu fare i te hoê mea aita e tu ra i te parau mau bibilia? Eiaha e mârô i nia i te hoê manaˈo tano ore, a haamauruuru râ i te fatu fare no to ˈna mau manaˈo e a faaohipa i te parau mai teie “Te ite nei au e te anaanatae mau nei oe i teie tumu parau.” (Kol. 4:6) Ia mârô atoa te hoê taata, e pinepine e nehenehe tatou e haapopou ia ˈna no to ˈna anaanatae mau i te tumu parau. E nehenehe tera huru raveraa e tamǎrû i te hoê taata o te patoi etaeta ra i te parau apî maitai.—Mas. 25:15.
5 No te faaitoito, e mea tia ia pûpûhia te haapopouraa ma te haavare ore. E faahanahana te faaohiparaa i tera mau huru parau haamaitai ia Iehova e e nehenehe vetahi ê e anaanatae i te poroi o te Basileia.