Paturaa Piha a te Basileia—te hoê tuhaa faufaa o te taviniraa moˈa
1. Eaha tei ravehia i te pae o te paturaa i te Piha a te Basileia, e eaha râ te hinaaro e vai noa nei?
1 I te roaraa o na matahiti e ono i mahemo, e 3 Piha a te Basileia tei patuhia e e 2 tei faaapîhia i te tuhaa fenua e tiaauhia ra e te amaa no Tahiti. Te haamauruuru mau atu nei matou no te rave-puai-raa te Tomite paturaa no te fenua i te ohipa e i te mau taata atoa i apiti atu. A rave-noa-hia ˈi te rahiraa o te ohipa, mea rahi â i te pae o te paturaa i te Piha a te Basileia. E nafea tatou paatoa e turu ai i teie tuhaa faufaa o ta tatou taviniraa moˈa ia Iehova?—Apo. 7:15.
2. E nafea tatou e nehenehe ai e turu roa ˈtu i te paturaa i te Piha a te Basileia?
2 E aau tae: Mai te peu e e taata poro bapetizohia oe, te titau manihini atu nei matou ia oe ia haavata ia oe no te rave i te ohipa e te Tomite paturaa ma te faaî i te api parau Construction des Salles du Royaume—Questionnaire pour les volontaires. (Sal. 110:3) E rave ohipa aau tae te mau rima tauturu atoa e e feruriraa haa amui to ratou e tia ˈi. (Sal. 133:1) Noa ˈtu e aita to oe e aravihi i te pae paturaa, e nehenehe noa ta oe e tauturu atu â ia manuïa te hoê paturaa. E nehenehe atoa oe e fanaˈo i te hoê faaineineraa ia faaohipahia ˈtu â oe a muri aˈe.
3. E nehenehe ta tatou e turu i teie faanahoraa na roto i teihea ˈtu â mau ravea?
3 Ia ore noa ˈtu oe e nehenehe e tauturu, e nehenehe ta oe e turu ma te faaitoito ia vetahi ê o te nehenehe e apiti atu. E nehenehe oe e tauturu i te rave i te mau hopoia i roto i te amuiraa a te feia o tei atea ê. Ma te faanaho na mua ˈˈe, e nehenehe te mau matahiapo e papu e te haapao-maitai-hia ra te amuiraa a patu ai te tahi pae i te hoê Piha a te Basileia. Ma te feaa ore, te oaoa ra Iehova ia rave amui tatou i te ohipa ma te auhoê no te haereraa o te mau faufaa a te Basileia i mua.—Heb. 13:16.
4. E nafea tatou e faaitoito ai i te feia o te apiti i te mau paturaa i te Piha a te Basileia?
4 E feruriraa maitai: E titau te paturaa i te mau vahi haamoriraa i te taime rahi e te rave-puai-raa i te ohipa. Ma te maramarama maitai, e atea ê te feia i titau-manihini-hia ia apiti i te mau paturaa i ta ratou iho amuiraa i te tahi mau taime. Ia oioi tatou i te haapopou e te faaitoito i te mau rima tauturu no te paturaa, o te rave i te mau haapaeraa no te haapao i teie “ohipa e hinaarohia.”—Ohi. 6:3, MN; Roma 14:19.
5. E nafea te mau rima tauturu no te paturaa e nehenehe ai e vai faito noa?
5 Ia vai faito noa: O te pororaa i te Basileia o te Atua ta tatou ohipa teotaratia faufaa roa. (Mar. 13:10) Ma te haamanaˈo i te reira, te tutava ra te Tomite paturaa no te fenua i te porotarama i te mau paturaa ia ore e titauhia i te mau rima tauturu ia atea ê i ta ratou amuiraa ma te faufaa ore. Oia atoa, e faaitoito te mau rima tauturu no te paturaa i te vai faito noa ia amo ratou i ta ratou hopoia e rave rahi. E rave ratou i te mau faanahoraa e hinaarohia ia papu ia ratou e e haapaohia ta ratou mau hopoia i roto i te amuiraa ia atea ê ratou.
6. Eaha te tupu ia haa amui te amuiraa taatoa no te faahaere i te haamoriraa mau i mua?
6 Ua faataa te aposetolo Paulo i te mau melo o te amuiraa mai te rave ra i te ohipa i roto i te auhoêraa ‘ia tupu te tino i te rahiraa o to ˈna iho maitai ma te aroha.’ (Eph. 4:16) E turai to tatou here ia Iehova e te hinaaro i te haamoriraa mau ia tatou ia haa amui no te poro i te parau apî maitai e no te turu i te paturaa i te Piha a te Basileia.