E nehenehe anei oe e faatano i ta oe porotarama?
1. No te aha e mea tia ˈi ia faatano tatou i ta tatou porotarama no te pororaa?
1 Ei Kerisetiano mau, ua farii tatou i te titau-manihini-raa e riro “ei ravaai taata.” (Mat. 4:19) Mai te mau taata ravaai mau, e faahopearaa maitai aˈe paha ta tatou e fanaˈo i roto i te ohipa ravaairaa i te taata ia porotarama tatou i te taime no te poro tei te fare te taata. I te fenua e rave rahi, e roa ˈtu â te mahana i te mau avaˈe e fatata maira. Mea taata ˈtu â i te fare i te ahiahi. E pinepine, e mea ru ore aˈe e e mea anaanatae aˈe ratou i te taata ratere. E nehenehe anei oe e faatano i ta oe porotarama no te poro i taua mau taime ra?—Kor. 1, 9:23.
2. Eaha te tahi mau ravea e nehenehe ai tatou e poro i te parau apî maitai i te taata e rave rahi?
2 Pororaa i te ahiahi: E nehenehe te faanaho-atea-raa i te poro i te mau hora ahiahi e tauturu ia tatou ia poro i te parau apî maitai i te taata e rave rahi. (Mas. 21:5) E nehenehe te feia apî e poro i muri aˈe i te haapiiraa. E nehenehe vetahi ê e na reira i muri aˈe i te ohipa. E nehenehe te tahi mau pǔpǔ haapiiraa buka e faanaho no te poro hoê hora hou te haapiiraa tahebedoma.
3. E nafea oe e nehenehe ai e poro i te mau hora ahiahi i roto i ta oe tuhaa fenua?
3 Na roto i te pororaa i tera fare i tera fare i te mau hora ahiahi e paraparauhia te taata aita iho â i te fare ei faahopearaa. I te tuhaa fenua e rave rahi, e nehenehe atoa e ravehia te faaiteraa na te mau aroâ, aore ra te tahi atu huru pororaa i te vahi taata i te ahiahi. E no e rave rahi, e taime maitai aˈe te ahiahi no te rave i te mau farerei-faahou-raa e no te haamata i te mau haapiiraa bibilia.
4. No te aha mea faufaa ˈi ia faaite i te haroaroaraa e ia faatura ia poro tatou i te ahiahi?
4 E titauhia te haroaroaraa: E titauhia te manaˈo maitai ia poro tatou i te ahiahi. E pinepine, e mea maitai aˈe ia poro noa i te mau hora ahiahi, eiaha râ ia farerei i te mau fatu fare a haere ai ratou e taoto. (Phil. 4:5) Ia patoto oe i te opani, a tia i te vahi e nehenehe ai oe e itehia mai, e a faaite maitai o vai oe. A faaite oioi i te tumu o to oe tere. Mai te peu e e haere oe i te hoê taime tano ore, oia hoi te tamaa ra te utuafare, a parau atu e e haere mai oe i te taime ê atu. A faatura noa.—Mat. 7:12.
5. E nafea tatou e nehenehe ai e ape i te mau fifi e nehenehe e tupu mai a poro ai tatou?
5 E titau-atoa-hia ia ara tatou i te tahi mau fifi e nehenehe e tupu mai. Mai te peu e te poro ra tatou ua marehurehu aore ra ua poiri, e haerea paari ia haere apipiti aore ra ei pǔpǔ. A faaea i roto i te mau aroâ turama-maitai-hia e te moemoe ore. A poro noa i te mau vahi e ore oe e haapeapea. A ape i te mau vahi e ere paha i te mea papu ia poiri.—Mas. 22:3.
6. Eaha te mau maitai hau e noaa mai ia poro i te ahiahi?
6 E tauturu te pororaa i te ahiahi ia tatou ia ohipa i roto i te taviniraa e te mau pionie tauturu e tamau. (Roma 1:12) E nehenehe anei oe e faatano i ta oe porotarama no te apiti i teie huru taviniraa?