E nehenehe anei oe e poro i te ahiahi?
1. Ia au i te hoê aivanaa, eaha te taime i poro ai te aposetolo Paulo na te mau fare?
1 Ia au i te hoê aivanaa, i poro na iho â Paulo na te mau fare mai te hora 4 i te taperaa mahana e tae atu i te maororaa po. Aita tatou i ite e ua poro noa anei Paulo i tera mau hora, te mea papu râ, ua na reira oia “no te evanelia.” (Kor. 1, 9:19-23) Ua faanaho ïa Paulo i ta ˈna ohipa no te poro na te mau fare i te taime e farerei rahi ai oia i te taata.
2. No te aha e taime maitai roa ˈi te ahiahi no te poro?
2 I te vahi e rave rahi, mea matauhia ia poro na te mau fare i te poipoi. E i to oe vahi, tera noa anei te taime maitai roa ˈˈe? No nia i ta ˈna tuhaa fenua, te faatia ra te hoê pionie: “Aita rea e taata i te fare i te ao. I te ahiahi roa râ, tei te fare ïa te rahiraa.” Tera ïa te taime maitai roa no te poro i te evanelia, i te mau tane iho â râ. E pinepine e mea mǎrû e mea farii aˈe te feia fare. Mai te peu e mea maitai ia na reira, ia faanaho ïa te mau matahiapo i te mau putuputuraa no te pororaa i te ahiahi.
3. E nafea ia faaite i te paari ia poro tatou i te ahiahi?
3 A faaite i te paari: Ia poro tatou i te ahiahi, mea faufaa te paari. Ei hiˈoraa, ia haere noa ˈtu oe e e taime tamaaraa tera, mea maitai aˈe ïa ia parau atu e e hoˈi mai oe i te tahi atu taime. Mai te peu e ua poiri, a tia ˈtu i te hoê vahi e ite mai ai te taata fare e a faaite oioi atu i to oe iˈoa e te tumu i haere mai ai oe. Mea paari atoa ia poro apitipiti aore ra ei pǔpǔ e ia faaea noa na te mau aroâ turama-maitai-hia. Eiaha e haere atu i te taime e taoto ai te taata. (Kor. 2, 6:3) Mai te peu e e ere i te hoê vahi papu roa ua poiri anaˈe, a poro ïa a maramarama noa ˈi.—Mas. 22:3.
4. Eaha te mau haamaitairaa ia poro i te ahiahi?
4 Haamaitairaa: Mea oaoa roa te taviniraa a nehenehe iho â ˈi tatou e paraparau i te taata. Rahi atu â tatou i te poro, rahi atu â ïa tatou i te tauturu i te tahi atu ia “ora, e ia noaa te ite i te parau mau.” (Tim. 1, 2:3, 4) E nehenehe anei oe e faanaho no te poro i te ahiahi?