A tauturu ia vetahi ê ia fanaˈo i te hoo
Oroa haamanaˈoraa i te poheraa o te Mesia e faatupuhia i te 12 no Eperera
1. Eaha te hoê ravea e faaite ai te nunaa o te Atua i to ˈna mauruuru no te hoo?
1 “Ia haamaitaihia te Atua i to ˈna ra horoa eita e tia ia parau ra.” (Kor. 2, 9:15) Ua tano maitai tera mau parau i to tatou manaˈo i te hamani maitai e te aau aroha ta te Atua e faaite ra i to ˈna nunaa na roto i ta ˈna Tamaiti ra o Iesu Mesia. E itehia iho â râ tera mauruuru a putuputu ai tatou i te 12 no Eperera no te faatupu i te Oroa haamanaˈoraa i te poheraa o te Mesia.
2. O vai te haere e te mau tavini a Iehova i te Oroa haamanaˈoraa, e eaha te titauhia ia rave ratou no te fanaˈo i te hoo?
2 E haere fatata 10 mirioni taata ê atu i te Oroa haamanaˈoraa e te mau Ite no Iehova i te matahiti taitahi. Ma te na reira, te faaite ra ïa ratou i te tahi faito mauruuru no te tusia o te Mesia. No te fanaˈo râ i te hoo, e mea tia ia faaohipa ratou i te faaroo i te reira. (Ioa. 3:16, 36, MN) E nafea tatou e nehenehe ai e tauturu ia ratou ia faahotu i taua faaroo ra? I teie tau o te Oroa haamanaˈoraa, e nehenehe tatou e faaitoito ia ratou ia rave i te hoê haapiiraa bibilia e ia haere mai i te mau putuputuraa tahebedoma. A hiˈo na i te mau manaˈo tauturu i muri nei.
3. E nafea tatou e nehenehe ai e haamata i te hoê haapiiraa bibilia ia titau manihini tatou i te taata i te Oroa haamanaˈoraa?
3 Te mau haapiiraa bibilia: Ia titau manihini outou i te feia anaanatae i te Oroa haamanaˈoraa, no te aha e ore ai e tamata i te haamata i te hoê haapiiraa bibilia e o ratou i nia i te buka Bibilia haapii? A tamata i te faataa i te Oroa haamanaˈoraa i te taata ma te iriti i te api 206-8 e ma te hiˈo i te tumu parau “Te Amuraa maa a te Fatu—te hoê oroa o te faahanahana i te Atua.” E nehenehe outou e hiˈo i tera haamaramaramaraa i roto hoê aore ra e piti farereiraa, peneiaˈe mai te hoê haapiiraa bibilia i te uputa. Ua oti anaˈe ia outou i te rave i tera tumu parau, e hinaaro paha te taata e aparau i te pene 5, “Te hoo—te ô rahi roa ˈˈe a te Atua.” I te haamauraahia iho â te hoê haapiiraa bibilia tamau, a hoˈi faahou e hiˈopoa i na pene matamua e maha o te buka.
4. E nehenehe tatou e haamata i te hoê haapiiraa bibilia e o vai i teie tau Oroa haamanaˈoraa?
4 E nehenehe tatou e haamata i te hoê haapiiraa bibilia e o vai ma te faaohipa i te ravea i nia nei? Peneiaˈe e farii vetahi o to outou mau hoa ohipa, hoa haapiiraa, aore ra taata tapiri i tera mau aparauraa. E nehenehe te mau taeae e aparau i te mau tane tiaturi ore a te mau tuahine i roto i te amuiraa. E eiaha e haamoe i to outou iho mau fetii e ere i te Ite. Hau atu â, e hinaaro tatou e tutava taa ê i te titau manihini i te feia i haa na e te amuiraa ma te itoito i mutaa ihora i te Oroa haamanaˈoraa. (Luka 15:3-7) Ia tutava tatou i te tauturu i te taatoaraa o tera mau taata ia fanaˈo i te hoo.
5. E nafea tatou e nehenehe ai e faaitoito i te mau piahi Bibilia e te tahi atu mau taata anaanatae ia haere i te mau putuputuraa tahebedoma a te amuiraa?
5 Te mau putuputuraa a te amuiraa: O te Oroa haamanaˈoraa te putuputuraa matamua ta e rave rahi piahi Bibilia e te tahi atu mau taata anaanatae e haere atu. E nafea râ tatou e nehenehe ai e faaitoito ia ratou ia haere e ia faufaahia ratou i te tahi atu mau putuputuraa a ta tatou amuiraa? Ua pûpû Ta tatou taviniraa i te Basileia no Eperera 2005 i te api 8 i te mau manaˈo tauturu i muri nei: “A faaite atu i te upoo parau o te oreroraa parau no te taatoaraa i mua. A faaite ia ratou i te tumu parau e hiˈopoahia i te haapiiraa o Te Pare Tiairaa e i te haapiiraa buka a te amuiraa. A faataa i te tereraa o te Haapiiraa o te taviniraa teotaratia e te Putuputuraa no te taviniraa. Mai te peu e e tumu parau ta outou i te haapiiraa, peneiaˈe e nehenehe outou e faahiti faahou i te reira e o ratou. A faaite ia ratou i te mau manaˈo faufaa i faahitihia i te mau putuputuraa. A faaohipa i te mau hohoˈa i roto i ta tatou mau papai no te tauturu ia ratou ia ite i te ohipa e tupu ra. Mai te haapiiraa matamua roa iho â, a titau manihini ia ratou ia haere i te mau putuputuraa.”
6. Mea na roto i teihea na ravea e piti e nehenehe ai tatou e tauturu i te feia aau haavare ore ia fanaˈo i te hoo?
6 Ia haapii tamau te feia aau haavare ore i te Bibilia e ia haere tamau ratou i te mau putuputuraa a te amuiraa, e pinepine ratou i te haere oioi i mua i te pae varua. Ia faaitoito ïa tatou ia vetahi ê ia haafaufaa i teie mau faanahoraa pae varua e ia fanaˈo i te ô rahi roa ˈˈe a te Atua—te hoo.