Te hoê haapiiraa o te tauturu ia tatou ia rave i te mau faaohiparaa e au
1 A hiˈopoa ˈi tatou i te mau tumu parau i roto i te Porotarama no te Haapiiraa o te taviniraa teotaratia 2006, e tutava tatou i te haafaufaa i te mau haapiiraa bibilia ma te faaohipa i te reira i roto i ta tatou taviniraa moˈa e to tatou oraraa i te mau mahana atoa. E faaoti papu tatou i te faaohipa i te mau mea ta tatou e haapii.—Ioa. 13:17; Phil. 4:9.
2 E horoa i te pahonoraa: E horoa te porotarama 2006 hoê minuti hau na te feia e faaroo ra ia nehenehe ratou e faahiti i te mau manaˈo faufaa bibilia ta ratou i anaanatae. Te auraa ïa e e ara te taeae na ˈna e vauvau i te mau manaˈo faufaa ia oti iho â ta ˈna tuhaa i roto e pae minuti, eiaha râ e ono. E ara atoa te feia i roto i te piha ia haapoto i ta ratou mau tatararaa. Ma te feruri maitai ê na i te mea ta ratou e parau, e nehenehe ratou e faahiti i te mau manaˈo tano maitai i roto e 30 tetoni aore ra iti mai. E nehenehe ïa fatata ahuru taata e pahono ma te maramarama i roto i na minuti e pae i faataahia no te pahonoraa a te feia e faaroo ra.
3 Oreroraa parau o te haapii: E haamataratara te mau manaˈo faufaa bibilia e te oreroraa parau haapiiraa i te faufaaraa o te tumu parau i hiˈopoahia ia faaohipahia i roto i ta tatou taviniraa aore ra te tahi atu mau tuhaa o to tatou oraraa i te mau mahana atoa. Eita noa te hoê taata orero e faaara i te hinaaro e ohipa i roto i te feia e faaroo ra ia ˈna. E haapapu oia eaha te ohipa e titauhia ia rave, e faaite oia e nafea ia rave i te reira, e e huti oia i te ara-maite-raa i nia i te mau maitai ia ravehia taua ohipa ra. E nehenehe ta ˈna e parau e, “Mea na reira teie irava e aratai ai ia tatou,” aore ra “Mai tera tatou e nehenehe ai e faaohipa i teie mau irava i roto i te taviniraa.” E tutava te mau matahiapo e te mau tavini tauturu tei ite maitai i te mau tupuraa o te amuiraa e o te tuhaa fenua, e nafea ia faaohipa ma te papu roa ˈˈe i te mau manaˈo i hiˈopoahia.
4 E nehenehe iho â râ e tano ia faahiti i te mau hiˈoraa bibilia ia faataa outou e nafea ia faaohipa ma te au. I muri aˈe i te faahitiraa i te hoê hiˈoraa bibilia, e nehenehe te taata orero e parau e, “E nehenehe outou atoa e farerei i te hoê â huru tupuraa e teie.” E hiˈo maitai oia e te tuati ra te faaohiparaa atoa o te hoê hiˈoraa bibilia i te mau irava tapiri, i te Bibilia taatoa, e te mau papai i neneihia e “te tavini haapao maitai e te paari.”—Mat. 24:45.
5 Te paari, o te aravihi ïa i te faaohipa i te ite e te maramaramaraa ma te manuïa. “O te paari â te mea maitai.” (Mas. 4:7) A noaa noa mai ai te paari maitai na roto i ta tatou mau haapiiraa i te Haapiiraa o te taviniraa teotaratia, e haamaitai atoa anaˈe i to tatou aravihi e tufa i te reira na vetahi ê.