E nehenehe anei ta outou tamarii e rave i te hoê faaotiraa paari?
1. Eaha te tiaraa ta te mau Ite apî i rave no nia i te faaohiparaa i te toto? A horoa i te hoê hiˈoraa.
1 Te hoê faaotiraa paari no nia i te aha? Te pâmuraa toto. Mai ta te tumu parau “A haere ma te haapiihia e Iehova” i faaite na i roto i Te Pare Tiairaa o te 1 no Tiunu 1991, ua titauhia ia rave te feia apî e Ite no Iehova to ratou mau metua i te hoê tiaraa paari no te faaite e mea faufaa roa no ratou mai to ratou mau metua atoa, ia auraro i te ture a te Atua no nia i te toto. E nehenehe anei ta ta outou tamarii e na reira atoa ia titauhia te reira i te hoê mahana?
2. Mai te peu e ua navai te hoê tamarii i te paari no te rave i te hoê faaotiraa, eaha ta ˈna e nehenehe e rave?
2 No te ite e ua navai anei te hoê tamarii i te paari no te rave i te hoê faaotiraa, e nehenehe te mau taote aore ra te tahi taata e mana to ratou e uiui i te taata maˈi no te faaroo ia ˈna iho ia faaite no te aha oia e patoi ai i te pâmuraa toto atoa. E mea tia ïa ia taa au noa i te tamarii te fifi o to ˈna maˈi e te mau faahopearaa o te mau maitiraa ta ˈna e rave i te pae rapaauraa. Hau atu â, e mea tia ia faaite oia ma te maramarama e te papu i ta ˈna iho e tiaturi ra no nia i te ture a te Atua no nia i te toto.
3. Eaha te mau uiraa e mea tia ia feruri maitai te mau metua, e no te aha?
3 Eaha ta ta outou tamarii e parau? E haere anei i ta outou mau tamarii ia faaite i to ratou iho manaˈo no nia i teie tumu parau? Te tiaturi papu ra anei ratou e na te Atua e faaue ra ‘eiaha e amu i te toto’? (Ohi. 15:29; 21:25) E nehenehe anei ta ratou e faataa i te reira maoti te Bibilia? E paruru anei ratou ma te itoito i to ratou tiaraa papu no nia i te toto ia parau mai te mau taote e nehenehe ratou e pohe? E na reira anei ratou noa ˈtu aita to ratou mau metua i pihai iho ia ratou? I te mea e ‘e tau e e tupuraa manaˈo-ore-hia to tatou atoa,’ e nafea outou e nehenehe ai e faaineine i ta outou mau tamarii ia faaruru i te mau tupuraa atoa o te tamata i to ratou hapa ore?—Koh. 9:11, MN; Eph. 6:4.
4, 5. (a) Eaha te hopoia a te mau metua, e e nafea ratou e nehenehe ai e amo i te reira? (b) Eaha te mau mauhaa e vai ra no te tauturu ia ratou?
4 E te mau metua, eaha ta outou e nehenehe e rave? E hopoia ta outou e haapii i ta outou mau tamarii i te manaˈo o te Atua i te toto. (Tim. 2, 3:14, 15) E faataaraa maramarama to roto i te buka Haaferuriraa, api 418-22. A hiˈopoa maite i te reira e to outou utuafare. Ma te faaohipa i te tuhaa “Ia parau mai te hoê taata e:” i te api 422-4, a rave i te mau taime faaineineraa e ta outou mau tamarii no te tauturu ia ratou ia ite atu â i te faataa i ta ratou e tiaturi ra e no te aha. (Pet. 1, 3:15) No te haamaramarama papu ia tatou i te parau o te toto, te vai atoa ra ta tatou te buka rairai Nafea te toto ia faaora i to outou ora? e Te Pare Tiairaa o te 1 no Tiurai 2004, api 9-18. Hau atu â, te vai nei i nia i te DVD, Des alternatives à la transfusion—Documentaires te mau porotarama video Soigner sans transfuser—Besoins et droits du patient e Pas de sang: la médecine relève le défi. Te horoa ra tera mau hohoˈa i te mau haamaramaramaraa papu no nia i te huru au noa e te aravihi o te rapaauraa e te tâpûraa aita e pâmuraa toto. Ua mataitai e ua aparau anei to outou utuafare i te reira aita i maoro aˈenei?
5 A tauturu i ta outou mau tamarii ia ‘ite i te hinaaro tia o te Atua ra, e te au, e te maitai’ no nia i te toto. E nehenehe ïa ratou e rave i te hoê faaotiraa paari ta Iehova e haamaitai.—Roma 12:2.