E nafea ia tauturu ia ratou?
1 Ia faaroo ratou e ua tupu te hoê ati i te tahi vahi o te fenua, e ui te mau Ite no Iehova ia ratou iho, no nia i te feia i roohia i te reira: “E nafea ia tauturu ia ratou?” Mai ta te faatiaraa i roto i te Ohipa 11:27-30 e faaite ra, ua horoa te mau Kerisetiano no te senekele matamua i te tauturu i to ratou mau taeae e parahi ra i Iudea, e oˈe tei tupu i reira.
2 I to tatou nei tau, e farii te faanahoraa ture a ta tatou mau taatiraa ia faaohipahia te moni no te tahi mau ohipa tauturu e haamaitairaa i te feia i faaruru i te mau ati natura aore ra faatupuhia e te taata, e no te tahi atu â mau tupuraa.
3 Ei hiˈoraa, i te matahiti i mairi aˈenei ua horoa e rave rahi Ite i te mau ô no te tauturu i te feia i roohia i te ati tsunami i Asia Apatoa. Ua haafaufaa-rahi-mau-hia taua mau ô ra pûpûhia ma te aau tae, tei tuuhia ˈtu i roto i te Afata moni tauturu a te faanahonahoraa a Iehova. Tera râ, ia ani te feia horoa e ia faaohipahia ta ratou ô no te hoê ati taa maitai, e titau te ture i roto i te tahi mau fenua ia aurarohia tera aniraa e ia faaohipahia tera moni i roto i te area taime faataahia, ua tauturuhia anei te mau taeae aore ra aita.
4 No reira, noa ˈtu e no te tauturu i te taata ta outou mau ô, te faaitoito nei matou ia outou ia horoahia ˈtu te reira no te ohipa na te ao atoa nei. E faaohipahia tera moni no te aufau i te mau tauturu e oia atoa te mau haamâuˈaraa tei taaihia i te haapaoraa i te mau hiaai pae varua o te taatoaraa o te mau taeae e tuahine Kerisetiano. Mai te peu e, no te tahi tumu ê, e hinaaro te hoê taata e horoa i te hoê ô no te mau tauturu, aita râ e hinaaro ra ia amuihia i tei horoahia no te turu i te ohipa na te ao atoa nei, e fariihia e e faaohipahia te reira a hinaarohia ˈi te tauturu. Tera râ, e mea maitai aˈe eiaha e taotia i te faaohiparaa aore ra te taime faaohiparaa o taua mau ô ra.
5 E mea maitai ia faataehia iho â te mau ô no te ohipa na te ao atoa nei. Mea rahi aˈe ïa te moni e nehenehe e faaohipahia no te aufau i te mau haamâuˈaraa taaihia i te mau tuhaa rau o te ohipa a te Basileia, e mea ohie aˈe te reira i te faaherehere-noa-raa i te moni no te mau ohipa tauturu no a muri aˈe. E tano tera huru raveraa i te manaˈo o te Ephesia 4:16, o te faaitoito ra ia tatou ia ohipa amui no te horoa i te mea hinaarohia e “tupu aˈera te tino i te rahiraa o to ˈna iho maitai ma te aroha.”