Ta ta tatou taviniraa e faatupu
1. E nafea Iehova e hiˈo ai i ta tatou taviniraa, e eaha te huru o te taata i mua i te reira?
1 Te faataa ra te Parau a te Atua i te mau Kerisetiano o te haere ra ma te upootia i te taviniraa ia Iehova. (Kor. 2, 2:14-16) A faaite haere ai tatou i te ite no nia i te Atua, e au te ô o ta tatou mau parau i te mea noˈanoˈa e mea au na Iehova. E haere mai vetahi no te hauˈa o te parau apî maitai area vetahi ê ra e fariu ê ïa. Noa ˈtu eaha te tupuraa, e ere no te mea aita te rahiraa o te taata e farii ra i te parau apî maitai, e mea manuïa ore ïa ta tatou ohipa. E hiˈo anaˈe i ta ta tatou taviniraa e faatupu.
2. E tauturu ta tatou taviniraa ia tatou ia faaite i te aha?
2 E faahanahana ia Iehova: Te parau ra Satani e te tavini ra te taata ia Iehova no te tahi mau tumu miimii. (Ioba 1:9-11) E ravea te taviniraa Kerisetiano no te haapapu e e mea haavare ore to tatou paieti i te Atua. Te tamau nei e rave rahi taata poro i te auraro i te faaueraa e poro e e faariro i te taata ei pǐpǐ, noa ˈtu te mau tupuraa fifi ta ratou iho e farerei aore ra te tâuˈa-ore-raa te taata e rave rahi i te parau apî maitai. Ma te faaoromai ma te taiva ore i tera mau tupuraa, e faaoaoa mau tatou i to Iehova aau!—Mas. 27:11.
3. No te aha e mea faufaa roa ˈi ia tamau tatou i te faaite i te iˈoa e te opuaraa a te Atua?
3 Hau atu â, e tuhaa ta ta tatou taviniraa i roto i te faatupuraa i te opuaraa a te Atua. No nia i te haamouraa i mua nei o te ao a Satani, te parau ra Iehova e: “E ite hoi te mau fenua e, o Iehova vau.” (Ezek. 39:7) Ia nehenehe te mau fenua e ite i te reira, e mea tia roa ia tamau ta te Atua mau tavini i te faaite i to ˈna iˈoa e ta ˈna opuaraa “i te mau fenua atoa, e te mau opu atoa, e te mau reo atoa, e te mau nunaa atoa.”—Apo. 14:6, 7.
4. E nafea te ohipa pororaa e riro ai ei niu no te haavaraa?
4 E niu no te haavaraa: E niu atoa te pororaa i te parau apî maitai no te haavaraa. Ua faaite te aposetolo Paulo e e hopoi mai o Iesu Mesia i te pohe i “te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra.” (Tes. 2, 1:8, 9) E haavahia te taata ia au i to ratou huru i mua i te parau apî maitai. Auê ïa hopoia rahi ta te mau tavini a te Atua! No te ape ia pohe te taata e o tatou te tumu, eiaha tatou e faaea i te faaite i te poroi faaora o te Basileia.—Ohi. 20:26, 27.
5. E nafea to te Atua aroha hamani maitai e itehia ˈi i roto i ta tatou taviniraa?
5 E faaiteraa ta tatou mau tutavaraa tamau no te tauturu i to tatou taata-tupu ia fanaˈo i te farii maitai a te Atua, i to Iehova aroha hamani maitai. (Tim. 1, 2:3, 4) Ma te ite e e tauiui noa te oraraa o te taata, e tutava â tatou i te farerei i te taata e e faaitoito ru ia ratou ia imi ia Iehova a vai noa ˈi te taime. I te na reiraraa, e faaite tatou i “te aroha rahi o to tatou Atua,” o tei ore “roa i hinaaro e ia pohe atu te hoê, ia noaa paatoa râ te tatarahapa.”—Luka 1:78; Pet. 2, 3:9.
6. E nafea tatou e faufaahia ˈi ia ohipa rahi tatou i roto i te taviniraa a Iehova?
6 E faufaahia tatou iho: E paruru te ohipa-rahi-raa i roto i te taviniraa a Iehova ia tatou. E tauturu te reira ia tatou ‘ia [haamanaˈo noa] i te mahana o te Atua ra’ o Iehova e ia ore ia viivii i teie nei faanahoraa o te mau mea nei [aore ra teie nei ao] e faaterehia ra e te ino. (Pet. 2, 3:11-14; MN; Tito 2:11, 12) Ia ‘itoito ïa tatou, eiaha e aueue, ia rahi â te rave i te ohipa a te Fatu,’ ma te ite hoi e e ere i te mea faufaa ore ta tatou mau tutavaraa i roto i te taviniraa Kerisetiano.—Kor. 1, 15:58.