E faaite anaˈe i te anaanatae mau: ma te hiˈo haere
1 Mea ite roa te Atua ra o Iehova e te Mesia ra o Iesu i te taa i te mau hiaai taa ê o te mau taata e i te pûpû atu i te tauturu. (Par. 2, 16:9; Mar. 6:34) Ia ite tatou i te mau anaanataeraa e tapitapi o te taata ta tatou e farerei i roto i ta tatou taviniraa, e nehenehe tatou e faatano i ta tatou faaiteraa i te parau apî maitai ia au i te reira.
2 E haapao maite anaˈe i te mau tuhaa rii: Ua hiˈo haere Iesu. (Mar. 12:41-43; Luka 19:1-6) Oia atoa, ia haafatata ˈtu tatou i te hoê fare e ia tapao tatou i te mau faaneheneheraa faaroo, poroi i nia iho i te mau pereoo, aore ra te mau hauti i roto i te aua, e nehenehe tatou e faatupu i te mau ravea no te poro ma te manuïa i te parau apî maitai.
3 E faaite paha te hohoˈa mata e te huru o te hoê taata i te tahi mea no nia i to ˈna huru aau. (Mas. 15:13) Peneiaˈe te ora ra oia i te tahi mau tupuraa ahoaho, mai te poheraa o te hoê taata here, e te hinaaro rahi ra oia i te tamahanahanaraa. E oaoa paha oia ia taio tatou ia ˈna vetahi mau irava e tano. (Mas. 16:24) Te ru ra anei te taata i te haere aore ra te amo ra anei oia i te hoê aiû e taˈi ra? Mai te peu e e, mea maitai paha ia hoˈi faahou atu i te tahi atu taime. Ma te faatura e te “faaite i te aumauiui,” e nehenehe tatou e turai i te taata ia faaroo mai ia hoˈi atu tatou.—Pet. 1, 3:8, MN.
4 A faatano i ta outou mau parau: Ua ite te aposetolo Paulo e te vai ra i te oire o Ateno te hoê fata i pûpûhia “na te Atua itea ore.” Ua faaohipa oia i teie haamaramaramaraa no te faatano i ta ˈna huru faaiteraa i te parau apî maitai e mea na reira to ˈna faahitiraa: “O ta outou . . . e haamori noa nei ma te ite ore ia ˈna, oia ta ˈu e parau atu ia outou nei.” Ua turai ta Paulo raveraa ma te faatano i te parau i te tahi pae o te taata i tae mai ia haapao maite i te poroi o te Basileia e ia riro ei taata tiaturi.—Ohi. 17:23, 34.
5 Oia atoa, e tauturu to tatou hiˈo-haere-raa ia tatou ia haroaroa i te mau anaanataeraa o te hoê taata e nehenehe atu ai tatou e faatano i ta tatou huru paraparau. A faaohipa i te mau uiraa o te faaitoito i te fatu fare ia parau mai i to ˈna manaˈo. A feruri i te mau irava o te nehenehe e faaohipahia ia rahi to ˈna anaanatae. (Mas. 20:5) E tauturu to tatou hiˈo-haere-raa e to tatou iho anaanatae haavare ore ia vetahi ê ia tatou ia faaite i te parau apî maitai ma te aravihi.