E faaite anaˈe i to Iehova hanahana
1 Ua faaite te papai salamo e: “E himene ia Iehova, e te mau fenua atoa nei. E faaite i to ˈna hanahana i roto i te mau etene [aore ra nunaa]; e ta ˈna ra mau ohipa taa ê i roto i te taata atoa ra.” Ia feruriruri tatou i ta Iehova i rave, e rave nei, e e rave â no tatou, e turai to tatou aau ia tatou ia faaite i to ˈna hanahana!—Sal. 96:1, 3.
2 I roto i ta tatou taviniraa: E fanaˈoraa taa ê ta te mau Ite no Iehova e amo i te iˈoa o te Atua e e arue i te reira i mua i te taata i te fenua atoa nei. (Mal. 1:11) Auê ïa taa-ê-raa e te pǔpǔ ekalesiatiko a te Amuiraa faaroo Kerisetiano, o tei tatara ma te teoteo i te iˈoa o te Atua i roto i ta ratou mau huriraa Bibilia! E ohipa ru te faaiteraa i te iˈoa o te Atua, i te mea e e mea tia ia tiaoro te mau taata i taua iˈoa ra ma te faaroo ia faaorahia ratou ia tae mai te ati rahi. (Roma 10:13-15) Hau atu â, maoti te faaraaraa i te iˈoa o te Atua e haamau-faahou-hia ˈi te hau na te ao taatoa nei, tae noa ˈtu te hau i rotopu i te mau taata e faaea ra i nia i te fenua. Ua taai-mau-hia te mau ohipa atoa a te Atua i to ˈna iˈoa.
3 “E rahi . . . Iehova, e ia rahi hoi te haamaitai ia ˈna.” Ia “ho atu” râ te taata “ia Iehova i te hanahana e au i to ˈna ra iˈoa,” e mea tia ia ite ratou i te parau mau no nia ia ˈna. (Sal. 96:4, 8) Teie râ, te patoi ra vetahi i te vai-mau-raa o te Atua. (Sal. 14:1) Te faaino ra te tahi atu ia ˈna ma te parau e aita to ˈna e mana, aore ra aita oia e tâuˈa ra i te mau ohipa a te taata. A tauturu ai tatou i te feia aau rotahi ia fanaˈo i te ite mau no nia i to tatou Atua Poiete, ta ˈna mau opuaraa, e to ˈna huru au mau, te faahanahana ra tatou ia Iehova.
4 Na roto i to tatou haerea: Ma te ora ia au i te mau ture aveia parau-tia a Iehova, te faahanahana ra tatou ia ˈna. E itehia mai to tatou haerea maitai roa. (Pet. 1, 2:12) Ei hiˈoraa, e nehenehe to tatou huru rapaeau mâ e te au maitai e faatupu i te mau parau maitai no ǒ mai ia vetahi ê ra, a fanaˈo atu ai tatou i te hoê ravea no te paraparau i te mau maitai ia ora ia au i te mau faaueraa tumu i roto i te Parau a te Atua. (Tim. 1, 2:9, 10) Auê tatou i te oaoa “ia hiˈo” vetahi ê ‘i ta tatou [mau ohipa maitai roa], e ia haamaitai i to tatou Metua i te ao ra’!—Mat. 5:16; MN.
5 Na roto i te parau e te ohipa, e faateitei anaˈe ïa i to tatou Atua faahiahia i te mau mahana atoa, a pahono atu ai i te piiraa oaoa: “E himene ia Iehova, e haamaitai i to ˈna iˈoa; e faaite i te ora na ˈna eiaha ei mahana tuua.”—Sal. 96:2.