E poro anaˈe i te taata e rave rahi roa
1. Eaha ta te mau Kerisetiano matamua i rave no te faaite i te parau apî maitai i te taata e rave rahi roa?
1 Ua faaitoito maite te mau pǐpǐ matamua a Iesu i te haaparare i te poroi o te Basileia. Ua rave ratou i te mau faanahoraa e au ia faaohipa no te faaite i te parau apî maitai i te taata e rave rahi roa. Ua tarima te feia papai Bibilia Kerisetiano i ta ratou mau papai faaurua na roto i te reo Heleni matauhia, te reo nunaa rau o te hau emepera Roma. Hau atu â, e au ra e o te feia poro itoito rahi no te senekele 2 e 3 T.T. te feia matamua i faaohipa i te codex, ohie aˈe ia faaohipa ˈtu i te hoê otaro no te hiˈo i te mau faahororaa.
2, 3. (a) E nafea te Isaia 60:16 e tupu ai i to tatou tau? (b) E nafea te mau ravea anohaa e faaohipahia ˈi no te turu i te haamoriraa viivii ore?
2 Faaohiparaa i te mau ravea anohaa: Na roto i te peropheta Isaia, ua faaite Iehova e: “E ote oe i te û no te mau fenua.” (Isa. 60:16) I roto i te tupuraa no teie tau o teie parau tohu, te faaohipa nei te mau Ite no Iehova i te mau ravea a te mau fenua, aore ra nunaa, no te turu i te pororaa evanelia. Ei hiˈoraa, i te matahiti 1914, tau matahiti hou te mau hohoˈa paraparau tavirihia a faaohipahia ˈi i roto i te tapihooraa, ua haamata te Feia haapii Bibilia i te pata i te “Photo-Drame de la Création.” Ua horoa tera pataraa hohoˈa tavirihia e te hauti ore ma te û e te haapurororaa reo e vau hora, i te hoê faaiteraa puai na te mau mirioni taata.
3 I teie mahana, te faaohipa nei te nunaa o te Atua i te mau matini neneiraa vitiviti e te mau mauhaa roro uira no te pia i te mau Bibilia e te mau papai bibilia na roto e mau hanere reo. Maoti te mau ravea utaraa oioi e tae ai tera mau papai i te mau vahi atea o te fenua, a fanaˈo atu ai te taata i roto e 235 fenua e tuhaa fenua. Maoti to ˈna varua, ua turai Iehova i ta ˈna mau tavini ia faaohipa maitai i tera mau ravea anohaa, a nehenehe atu ai e rave rahi roa taata e ite i te parau mau bibilia.
4. Eaha te mau tauiraa ta vetahi i rave i roto i to ratou oraraa no te faaite i te parau apî maitai i te taata e rave rahi atu â?
4 Faatanoraa a te taata taitahi: Ua turai-atoa-hia te feia haamori mau ia rave i te mau tauiraa no ratou iho no te faaite i te parau apî maitai i te taata e rave rahi atu â. Mea rahi tei faaohie i to ratou oraraa no te apiti atu â i te pororaa. Ua haere vetahi i te mau vahi e hinaaro-rahi-hia ˈi te feia poro i te Basileia. Ua faarahi te tahi atu i ta ratou taviniraa ma te haapii i te hoê reo ê.
5, 6. Eaha ta tatou e nehenehe e rave i roto i ta tatou tuhaa fenua no te faaite i te parau apî maitai i te taata e rave rahi roa?
5 Hau atu â, e nehenehe tatou e faaite i te parau apî maitai i te taata e rave rahi atu â ma te poro i te mau taime to te fare ratou e i te mau vahi to reira ratou. Mai te peu e i roto i ta outou tuhaa fenua, mea rahi aita i te fare i te roaraa o te mahana, e nehenehe anei outou e faanaho ia outou no te poro i te ahiahi? Te vai ra anei te tahi mau vahi taata e nehenehe ai e horoa i te faaiteraa? Ua tamata anei outou i te poro na roto i te niuniu paraparau aore ra i roto i te mau tuhaa fenua tapihoo? Te imi ra anei outou i te mau taime maitatai no te poro ma te faanaho-ore-hia?
6 Mea fanaˈo tatou i te apitiraa i te faaiteraa rahi roa e horoahia ra no nia i te iˈoa o Iehova e i to ˈna Basileia! Ia tamau ïa tatou i te faaite i te parau mau faaora i roto i te Parau a te Atua i te taata e rave rahi roa!—Mat. 28:19, 20.