Tuhaa 9: E faatere anaˈe i te mau haapiiraa bibilia o te paturu i te mau haereraa i mua
E faaineine anaˈe i te mau piahi ia poro ma te faanaho-ore-hia
1 I to Anederea raua Philipi iteraa e o Iesu te Mesia i tǎpǔhia, ua turaihia raua ia faaite i teie parau apî oaoa ia vetahi ê. (Ioa. 1:40-45) I teie mahana atoa, a faatupu ai te mau piahi Bibilia i te faaroo i nia i ta ratou e haapii ra, te turaihia ra ratou ia paraparau no nia i te reira. (Kor. 2, 4:13) E nafea tatou e nehenehe ai e faaitoito ia ratou ia poro ma te faanaho-ore-hia e e faaineine ia ratou ia manuïa roa?
2 E nehenehe outou e ani noa i te piahi mai te peu e te paraparau ra o ˈna ia vetahi ê no nia i ta ˈna e haapii ra i roto i te Bibilia. Peneiaˈe e nehenehe o ˈna e titau manihini i te mau hoa aore ra i te mau melo o to ˈna utuafare ia apiti mai i te haapiiraa. A ani ia ˈna mai te peu e te anaanatae ra te hoê hoa ohipa, hoa haapiiraa, aore ra te tahi atu mau taata ta ˈna i matau i te parau apî maitai. E nehenehe ïa o ˈna e haamata i te horoa i te faaiteraa. A tauturu ia ˈna ia taa i te faufaaraa ia haroaroa, ia faatura e ia faaite i te mǎrû ia paraparau o ˈna ia vetahi ê no nia ia Iehova e ta ˈna mau opuaraa.—Kol. 4:6; Tim. 2, 2:24, 25.
3 Ia faaite ratou i ta ratou mau tiaturiraa: E mea faufaa roa ia haapii i te mau piahi Bibilia ia paraparau i ta ratou mau tiaturiraa ma te faaohipa i te Parau a te Atua. I te taime haapiiraa, i te mau taime tano maitai, a ui i te piahi: “E nafea outou e faataa ˈi ma te faaohipa i te Bibilia, i teie parau mau i to outou utuafare?” aore ra: “Eaha te irava bibilia ta outou e faaohipa no te faataa i te reira i te hoê hoa?” A faaroo maitai i ta ˈna pahonoraa e a faaite ia ˈna e nafea ia niu i ta ˈna haapiiraa i nia i te mau Papai. (Tim. 2, 2:15) I te na reiraraa, e faaineine ïa outou i te piahi ia poro ma te faanaho-ore-hia e ma te faanaho atoa e te amuiraa ia faaî o ˈna i te mau titauraa.
4 E mea paari ia faaineine i te mau piahi Bibilia ia faaruru i te patoiraa. (Mat. 10:36; Luka 8:13; Tim. 2, 3:12) Ia ui mai te tahi atu mau taata aore ra ia parau mai ratou no nia i te mau Ite no Iehova, e ravea ïa te reira no te mau piahi ia horoa i te faaiteraa. E nehenehe te buka rairai Les Témoins de Jéhovah: Qui sont-ils? Quelles sont leurs croyances? e tauturu ia ratou ‘ia vai ineine ratou ia parau atu.’ (Pet. 1, 3:15) E pûpû mai te reira i te mau haamaramaramaraa papu ta te feia apî e nehenehe e faaohipa no te tauturu i te mau hoa aore ra te mau melo utuafare e opua maitai ra no te taa i ta tatou mau tiaturiraa e ta tatou mau ohipa i niuhia i nia i te Bibilia.