Ua fatata te mahana o Iehova
1 Te hinaaro rahi ra te mau Kerisetiano ia tae mai te mahana o Iehova, i reira oia e haamou ai i teie faanahoraa o te mau mea e e haamau ai i te hoê ao apî parau-tia. (Pet. 2, 3:12, 13) I te mea e aita tatou i ite mau afea te reira e tae mai ai, e mea tia ia vai ara noa tatou e ia tauturu i to tatou taata-tupu ia na reira atoa. (Ezek. 33:7-9; Mat. 24:42-44) E haapuai te feruriruriraa i te Parau tohu a te Atua i to tatou tiaturiraa e “ua fatata te mahana rahi o Iehova.”—Zeph. 1:14.
2 Te tereraa o te mau hau o te ao nei: I roto i te Apokalupo 17:9-11, te faahiti ra te aposetolo Ioane i na “arii toohitu,” o te faahohoˈa ra i na hau e hitu o te ao nei te tahi i muri i te tahi. Te faahiti atoa ra Ioane i te “arii toovau,” o te faahohoˈahia i teie mahana i te Nunaa Amui. E tiai anei tatou ia fa mai vetahi atu mau hau o te ao nei? Eita, no te mea te faahiti ra te parau tohu, “e e reva ˈtu â” te vau o te arii “i te pohe,” i muri aˈe aita e arii faahou i nia i te fenua i faahitihia. Te tauturu ra anei teie parau tohu ia outou ia taa e teihea tatou i roto i te tereraa o te tau?
3 Te tauturu ra te Daniela 2:31-45 ia taa tatou i te taeraa mai te mahana o Iehova. I roto i teie parau tohu, te faahohoˈa ra te tii rahi ta Nebukanesa i ite i roto i te hoê moemoeâ i te mau hau o te ao nei te tahi i muri i te tahi. Ua fa taitahi aˈena mai tera mau hau. No reira, teihea roa tatou i roto i te tereraa o te tuatapaparaa i teie mahana? Tei te tau tei faahohoˈahia e te mau avae o te tii. Te faataa ra te parau tohu ma te oraora i te tupu i muri iho. E haamou-roa-hia te faatereraa taata, a vaiiho ai i te parahiraa i “te hoê basileia, o te ore roa ïa e mou.” Te ite ra anei outou e nafea te reira e haapapu ai e ua fatata te mahana o Iehova?
4 Te mau haapapuraa hau: Te tahi atu haapapuraa e ua fatata te mahana o Iehova, te ite nei tatou te tupuraa i mua i to tatou mata i ta te aposetolo Paulo i tohu no nia i te huru o te mau taata “i te anotau hopea.” (Tim. 2, 3:1-5) Hau atu â, te ohipa ra tatou i roto i te pororaa e mea tia ia ravehia te reira na te ao atoa nei hou a tae mai ai te hopea. (Mat. 24:14) Ia tamau ïa ta tatou taviniraa i mua i te taata i te faaite i te huru ru o te parau a te melahi: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra.”—Apo. 14:6, 7.