Te mau maitai o te Haapiiraa o te taviniraa teotaratia
1 E haamaitairaa otahi ta te nunaa o Iehova e fanaˈo i te haapiiraa teotaratia. (Isa. 54:13; Ioa. 6:45) Ua taai-rahi-hia râ te faufaaraahia tatou i te reira i ta tatou mau tutavaraa. Te ite maite ra anei outou i te mau faahopearaa maitatai o te Haapiiraa o te taviniraa teotaratia i nia i to outou huru pae varua?
2 Manaˈo haapopou: E rave rahi tiaau no te haapiiraa tei tapao e maoti te faahohonuraa o te mau tuhaa oreroraa, ua aravihi atu â ta ratou amuiraa i roto i te taviniraa. Hau atu â, ua itea mai i te hoê tiaau no te haapiiraa e maoti te faanahoraa ia pahono te feia e faaroo ra i te mau manaˈo faufaa o te taioraa bibilia, ua rahi atu â o te pee ra i te porotarama taioraa bibilia. No nia i te tumu parau no 2, e rave rahi taeae tei horoa i te mau manaˈo mauruuru no nia i te mau maitai o te haapao-noa-raa i te tuhaa taioraa ma te ore e faaineine i te tahi omuaraa parau e te tahi parau puohuraa. I teie nei, te haapao atu â ra te feia o tei rave i teie tuhaa i te haamaitai i to ratou ite i te taio.—Tim. 1, 4:13.
3 E nehenehe te taatoaraa e faufaahia: E nehenehe e riro ei mea au roa ia pahono i te mau putuputuraa. (Mas. 15:23) Ma te fanaˈo oioi i te mau uiraa no te haamanaˈoraa parau vaha, e nehenehe ïa tatou e faaineine e e apiti ohie noa ˈtu. Hau atu â, i roto i Te Pare Tiairaa mai te 1 no Tenuare 2004 mai â, te vai ra te mau manaˈo faufaa o te mau buka bibilia o te tuati ra i ta tatou taioraa i faataahia no te Haapiiraa o te taviniraa teotaratia. Ua tauturu taua mau tumu parau ra e rave rahi taata ia horoa i te mau pahonoraa faaitoito a hiˈopoahia ˈi te mau manaˈo faufaa o te taioraa bibilia.
4 E fanaˈoraa taa ê ta te feia atoa i tapao ia ratou i te haapiiraa i te faaineineraa e te horoaraa i te mau tumu parau. E nehenehe tatou paatoa e faufaahia i te mau haapopouraa na mua mai a te tiaau no te haapiiraa. E fanaˈo te piahi taitahi i te mau aˈoraa ta te tiaau no te haapiiraa e horoa o raua anaˈe i muri aˈe i te putuputuraa. E tauturu atoa te mau faaineineraa o te mau tuhaa oreroraa i te pae hopea o te pene taitahi o te buka Tirez profit de l’École du ministère théocratique.
5 Ia faaitehia ˈtu te tahi mau manaˈo bibilia e au ia faaohipa i te roaraa o te haapiiraa e i muri aˈe, a tapao atu i roto i ta outou buka École du ministère. A feruriruri i ta outou i haapii mai, e a hiˈo e nafea teie tuhaa o te haapiiraa a te Atua e haamaitai ai i to outou huru pae varua.