Tuhaa 4: E faatere anaˈe i te mau haapiiraa bibilia o te paturu i te mau haereraa i mua
E haapii anaˈe i te mau piahi i te faaineine
1 Te hoê piahi o te taio na mua i te haapiiraa, o te reni i te mau pahonoraa e o te feruri e nafea ia pahono na roto i ta ˈna iho mau parau, e pinepine oia i te haere oioi i mua i te pae varua. No reira, ua mau anaˈe te hoê haapiiraa tamau, a faaineine e te piahi i te hoê haapiiraa no te faaite ia ˈna e nafea ia rave. E pinepine, e mea maitai ia faaineine apipiti i te hoê pene aore ra haapiiraa taatoa.
2 Reniraa e tapaopaoraa: A faataa e nafea e itea mai ai te pahonoraa o te mau uiraa neneihia. A faaite i te piahi i ta outou iho buka haapiiraa i reira to outou reniraa i te mau taˈo aore ra pereota faufaa anaˈe. A na reira ˈi outou, e hinaaro paha oia e pee i ta outou raveraa, ma te reni i nia i ta ˈna buka i te mea hinaaro-noa-hia o te tauturu ia ˈna ia haamanaˈo i te pahonoraa. (Luka 6:40) I muri iho, a ani ia ˈna ia horoa i te pahonoraa na roto i ta ˈna iho mau parau, e ite ïa outou e ua taa maitai anei ia ˈna te tumu parau.
3 Te hiˈopoa-maitai-raa i te mau irava faahitihia, o te tuhaa faufaa ïa o te faaineineraa i te piahi no te haapiiraa. (Ohi. 17:11) A tauturu ia ˈna ia ite e e paturu te mau irava faahitihia atoa i te hoê manaˈo o te paratarafa. A faaite ia ˈna e nafea ia tapaopao poto noa i te hiti api o ta ˈna buka haapiiraa. A haapapu ia ˈna e o te Bibilia te niu o ta ˈna haapiiraa. A faaitoito ia ˈna ia faaohipa rahi i te mau irava faahitihia i roto i ta ˈna mau pahonoraa i te roaraa o te haapiiraa.
4 Haapotoraa e haamanaˈoraa: Hou te piahi a haamata ˈi i ta ˈna faaineineraa hohonu o te haapiiraa, e mea maitai ia hiˈopoa taatoa oia i te tumu parau, oia hoi ma te hiˈo poto noa i te upoo parau o te pene, te mau upoo parau iti, e te mau hohoˈa. A faataa ˈtu e hou a faaoti ai i ta ˈna faaineineraa, e mea maitai ia rave oia maa taime no te haamanaˈo i te mau manaˈo faufaa o te haapiiraa, peneiaˈe ma te faaohipa i te tumu parau tarenihia o te haamanaˈoraa mai te peu e te vai ra. E tauturu taua hiˈo-faahou-raa ia ˈna ia tapea mai i te haapiiraa.
5 E nehenehe te haapiiraa i te piahi i te faaineine maitai i ta ˈna haapiiraa e tauturu ia ˈna ia horoa i te mau pahonoraa anaanatae i te mau putuputuraa a te amuiraa. E nehenehe atoa te reira e tauturu ia ˈna ia tapea i ta ˈna mau peu haapiiraa e faufaahia ˈi oia i muri roa ˈˈe atoa e hope ai ta ˈna iho haapiiraa bibilia.