Tuhaa 3—E faatere anaˈe i te mau haapiiraa bibilia o te paturu i te mau haereraa i mua
E faaohipa anaˈe i te mau Papai ma te aravihi
1. No te aha e mea tia ˈi ia haamahitihiti i te mau Papai ia faatere tatou i te mau haapiiraa bibilia?
1 Ta tatou fa ia faatere tatou i te mau haapiiraa bibilia, o te ‘faariroraa ïa i te taata ei pǐpǐ’ ma te tauturu ia ratou ia taa e ia farii i te mau haapiiraa a te Parau a te Atua e ia faaohipa te reira i roto i to ratou oraraa. (Mat. 28:19, 20; Tes. 1, 2:13) No reira, e mea tia ia niuhia te haapiiraa i nia i te mau Papai. Na mua, e mea faufaa paha ia faaite i te piahi e nafea ia imi i te mau irava i roto i ta ˈna iho Bibilia. Tera râ, e nafea tatou e nehenehe ai e faaohipa i te mau Papai no te tauturu i te piahi ia haere i mua i te pae varua?
2. E nafea tatou e faaoti ai teihea mau irava bibilia e taio e e tatara?
2 A maiti i te mau irava e taio: I roto i ta outou faaineineraa, a hiˈo e nafea te irava bibilia taitahi e tuati ai e te tumu parau e hiˈopoahia ra, e a faaoti teihea mau irava ta outou e hiˈo mai e a aparau i te roaraa o te haapiiraa. E mea maitai iho â ia taio i te mau irava e haapapu ra i te niu bibilia o ta tatou mau tiaturiraa. E nehenehe te mau faahitiraa e haapapu ra i te mau manaˈo rii paturu e ore e taiohia. A tâuˈa i te mau hinaaro e te mau tupuraa o te piahi taitahi.
3. Eaha te maitai o te faaohiparaa i te mau uiraa, e nafea tatou e nehenehe ai e na reira?
3 A faaohipa i te mau uiraa: Maoti i te tatara i te mau irava bibilia i te piahi, a ani atu ia ˈna ia faataa mai. E nehenehe outou e turai ia ˈna ia na reira ma te faaohipa aravihi i te mau uiraa. Mai te peu e e mea papu te faaohiparaa o te hoê irava, e nehenehe outou e ani noa ˈtu ia ˈna e mea nafea to te irava patururaa i tei faahitihia i roto i te paratarafa. I te tahi atu mau tupuraa, e mea titauhia paha te hoê uiraa tano aˈe aore ra te hoê nanairaa uiraa, no te aratai i te piahi i te faaotiraa tano. Mai te peu e e titauhia te mau tatararaa hau, e nehenehe outou e horoa ˈtu i muri aˈe a pahono mai ai te piahi.
4. E mea tia anei ia faataa huˈahuˈa roa i te mau irava ta tatou e taio ra?
4 A faaohie noa i te parau: E faaohipa pinepine te taata teˈa aravihi i te hoê noa ohe ia raea ta ˈna fa. Oia atoa, eita te hoê orometua haapii aravihi e faarahi i te parau no te faataa i te hoê manaˈo. E nehenehe oia e horoa i te ite ma te hoê ravea ohie, papu e te tano. E titauhia paha outou i te tahi taime ia rave i te mau maimiraa i roto i te mau papai ia taa i te hoê irava e ia faataa ˈtu ma te tano. (Tim. 2, 2:15) E ape râ tatou i te faataa huˈahuˈa roa i te mau irava atoa a faatere ai i te haapiiraa. A rave noa i te mau manaˈo paturu e hinaaro-mau-hia no te haapapu i te manaˈo e tauaparauhia ra.
5, 6. E nafea tatou e nehenehe ai e tauturu i te mau piahi ia faaohipa i te Parau a te Atua i roto i to ratou oraraa, eaha râ te mea tia ia ape tatou?
5 A huti mai i te mau faaohiparaa e au: Ia tano anaˈe, a tauturu i te piahi ia ite e mea nafea te mau irava bibilia e tano ai i to ˈna iho tupuraa. Ei hiˈoraa, ia hiˈopoa outou i te Hebera 10:24, 25 e te hoê taata aitâ e amui mai atura i te mau putuputuraa Kerisetiano, e nehenehe outou e tauaparau no nia i te hoê o taua mau putuputuraa ra e e titau manihini atu ai ia ˈna ia amui mai. Eiaha râ e faahepo ia ˈna. A vaiiho e na te Parau a te Atua e turai ia ˈna ia rave i tei titauhia ia au mai Iehova ia ˈna.—Heb. 4:12.
6 E rave faahope anaˈe i ta tatou ohipa e faariro i te taata ei pǐpǐ ma te haapao “ia noaa ia ratou te haapao faaroo ra” na roto i te faaohiparaa i te mau Papai ma te aravihi.—Roma 16:26.