Pahonoraa i ta outou mau uiraa
◼ E nafea tatou ia haapao i te mau hopoia i roto i te amuiraa?
E tere maitai te hoê amuiraa ia tutava amui anaˈe te taatoaraa o te mau tavini a Iehova o taua amuiraa ra. (Kor. 1, 14:33, 40) A feruri na i tei titauhia ia haapao no te hoê noa putuputuraa a te amuiraa, taa ê atu i te haapiiraa. Na mua ˈˈe e i muri aˈe, e ohipa te mau taeae e tuahine i roto e rave rau hopoia. E mea faufaa atoa te tahi atu â mau hopoia, o te ore e itehia. E nafea tatou taitahi e nehenehe ai e turu i teie faanahoraa?
A haavata ia outou. E rave rahi ohipa ta te mau rima tauturu e nehenehe e rave. (Sal. 110:3) A tapitapi i te feia maˈi e ruhiruhia. A apiti atu i te tamâraa o te Piha a te Basileia. E nehenehe tatou e ohipa ma te ravea rau ma te tiai ore ia anihia mai tatou. Tei te hinaaro-noa-raa tatou e tauturu.
A tavini ia vetahi ê ma te aau faahaihai. E oaoa te feia aau faahaihai i te tavini ia vetahi ê. (Luka 9:48) E tapea te aau faahaihai ia tatou ia farii hau atu â i te mau hopoia i ta tatou e nehenehe e amo ma te tano. E tapea atoa te reira ia tatou ia faaohipa hua i to tatou iho mana.—Mas.11:2.
Ei taata tiaturihia outou. Ua faaitoitohia Mose ia maiti i te mau “taata haapao maitai [aore ra tiaturihia]” no te amo i te mau hopoia i Iseraela. (Exo. 18:21) Mea titau-atoa-hia tauâ huru maitai ra i teie mahana. A haapao maite i te mau hopoia atoa tei horoahia mai ia outou. (Luka 16:10) Mai te peu e eita ta outou e nehenehe e haapao i te hoê hopoia, a rave i te mau faanahoraa e na te tahi atu e rave aita anaˈe outou.
A horoa taatoa ia outou. Te aˈohia ra te mau Kerisetiano ia ohipa ma to ratou nephe atoa, i roto atoa i te mau ohipa a teie nei ao. (Kol. 3:22-24) E tumu rahi atu â ta ratou ia na reira i roto i te haamoriraa mau. Noa ˈtu e e ohipa iti haihai aore ra faufaa ore ia hiˈohia, e haamaitairaa no te amuiraa ia rave-maitai-hia te reira.
E ravea anaˈe teie mau hopoia atoa no te faaite i to tatou hinaaro ia Iehova e i to tatou mau taeae. (Mat. 22:37-39) Ia haapao maitai tatou i te mau hopoia atoa tei horoahia mai.