E faaohipa maitai anaˈe i te Bibilia
1. E nafea tatou e faaineine ai ia tatou no te taviniraa?
1 Noa ˈtu eaha te huru papai ta tatou e opua ra e pûpû i roto i te taviniraa, e mea maitai ia maiti i te hoê irava o te haaferuri i te feia e faaroo mai ia tatou. (Heb. 4:12) Ma te rave faahou mai i te hoê irava faahitihia i roto i tera papai, e faatuati ïa tatou i ta tatou omuaraa parau e te papai. I te tahi mau vahi, te ite ra te feia poro i te faufaaraa ia tapea i te Bibilia i roto i to ratou rima ia haafatata ˈtu ratou i te hoê taata aore ra ia poro ratou i tera e tera fare.
2. (a) E nafea tatou e omua ˈi i ta tatou aparauraa ma te hoê irava? (b) Eaha te mau tumu parau bibilia ta te feia o ta outou tuhaa fenua e anaanatae ra?
2 E haamata anaˈe ma te hoê irava: E haamata vetahi feia poro i ta ratou aparauraa ma te ani atu i te taata i to ˈna manaˈo no nia i te hoê irava bibilia o ta ratou e taio i muri aˈe. E aratai oioi ratou i te ara-maite-raa o te taata i nia i te Parau a te Atua ia na reira ratou. E faufaahia anei vetahi o taua mau omuaraa parau ra i roto i ta outou tuhaa fenua?
◼ “Ahiri e mana to oe, eita anei oe e faatupu i te mau tauiraa e faataahia ra i ǒ nei?” E taio tatou i te Apokalupo 21:4.
◼ “No te aha tatou e ora ˈi i te hoê anotau ati mau?” E taio tatou i te Timoteo 2, 3:1-5.
◼ “Ia manaˈo oe e maitai mai anei to tatou totaiete ahiri te taata atoa e faaohipa i teie aˈoraa?” E taio tatou i te Mataio 7:12.
◼ “Ia manaˈo oe e fanaˈo anei ta oe mau tamarii i te mau huru tupuraa e faataahia ra i ǒ nei?” E taio tatou i te Salamo 37:10, 11.
◼ “Ia manaˈo oe e tupu mau anei teie mau parau i te hoê mahana?” E taio tatou i te Isaia 33:24.
◼ “Ua faaroo ê na anei oe i te tauiraa o te faatereraa e faahitihia ra i ǒ nei?” E taio tatou i te Daniela 2:44.
◼ “Aita anei oe i hinaaro aˈenei e tuu i teie uiraa i te Atua?” E taio tatou i te Ioba 21:7.
◼ “E nehenehe anei e ite faahou i te feia pohe tei herehia e tatou?” E taio tatou i te Ioane 5:28, 29.
◼ “E ite anei te feia pohe i te ohipa ta te feia ora e rave ra?” E taio tatou i te Koheleta 9:5.
3. E nafea e tauturu ai i te taata ia taa i te mau irava bibilia ta tatou e taio atura?
3 E faataa, e faahohoˈa, e e faaohipa anaˈe: Ia anaanatae te hoê taata i te paraparau, eiaha tatou e ru noa i te aparau. E rave râ tatou i te taime no te faataa, faahohoˈa e no te faaohipa i te irava ta tatou i taio atu ia taa i te taata i te mea e parauhia ˈtura. (Neh. 8:8) Ia taa e ia farii te taata i ta te Parau a te Atua e haapii ra, e nehenehe te taata e rave i te mau tauiraa faahiahia i roto i to ratou oraraa.—Tes. 1, 2:13.
4. E nafea tatou e faaohipa maitai ai i te Bibilia i roto i te mau farerei-faahou-raa?
4 E tamau anaˈe i te faaohipa maitai i te Bibilia a atuatu ai tatou i te anaanatae. E nehenehe tatou e faaohipa i te hoê â raveraa i roto i te mau farerei-faahou-raa: (1) E maiti tatou i te hoê irava tano. (2) E tuu tatou i te hoê uiraa manaˈo ohie no nia i te irava, e e taio tatou i te irava. (3) E faataa, e faahohoˈa, e e faaohipa tatou i te reira. E tutava tatou i te faarahi atu i to te taata ite i te Parau a te Atua i te mau taime atoa tatou e hoˈi faahou ai e farerei. E fatata roa, e nehenehe paha tatou e taio ei haapiiraa bibilia apî!