E tapea anaˈe i te mata maitai
1. Eaha te auraa ia tapea i te mata maitai, e no te aha e mea faufaa?
1 I roto i te Aˈoraa i nia i te mouˈa, ua parau Iesu no nia i te mana rahi ta to tatou mata, taipe aore ra pae varua, e nehenehe e faatupu i nia i to tatou oraraa. Ua na ô oia e: “Te maitai ra to mata, e maramarama ïa to tino atoa; ia maˈihia râ to oe mata, e pouri ïa to tino atoa.” (Mat. 6:22, 23) E tiatonu te hoê mata maitai i nia i te hoê noa tapao—te faatupuraa i te hinaaro o te Atua—ma te ore e haafifihia e te haapeapea-rahi-raa i te mau mea materia. (Mat. 6:19-21, 24-33) Eaha te tauturu ia tatou ia tapea noa i te mata maitai?
2. Eaha te hiˈoraa tano maitai i te mau mea materia ta te Parau a te Atua e faaitoito ra?
2 E atuatu anaˈe i te mauruuru: E titauraa bibilia te haapao-maitai-raa i te mau hinaaro o to ˈna utuafare. (Tim. 1, 5:8) Aita râ taua hopoia ra e titau e ia tapi noa tatou ma te maumau ore i te mau mea maitai aˈe e tae apî mai. (Mas. 27:20; 30:8, 9) Te faaitoito maira râ te Bibilia ia mauruuru noa tatou i ‘te maa e te ahu,’ te mau mea faufaa o te oraraa. (Tim. 1, 6:8; Heb. 13:5, 6) E tauturu to tatou haapao-maitai-raa i teie aˈoraa ia tapea tatou i to tatou mata tiatonu-maitai-hia.
3. Eaha te tauturu ia tatou ia ore tatou e teimaha roa?
3 E mea paari ia ore tatou e faateimaha ia tatou iho i te mau tarahu hinaaro-ore-hia, aore ra i te mau taoˈa aore ra ohipa e titau rahi i te taime e te ara maite. (Tim. 1, 6:9, 10) E nafea ïa tatou? Ia opua tatou i te rave i te hoê mea, e pure tatou ma te hiˈopoa maite i te reira e ma te haavare ore mai te peu e e haafifi ta tatou faaotiraa i ta tatou mau ohipa pae varua. Ia faaoti papu tatou i te tapea i te mau mea pae varua i te parahiraa matamua.—Phil. 1:10; 4:6, 7.
4. No te aha e mea tia ˈi ia imi tatou i te ravea no te faaohie i to tatou oraraa?
4 E faaohie anaˈe i to tatou oraraa: Te tahi atu tauturu no te patoi i te aratoraa o te nounou taoˈa, te faaohieraa ïa i to tatou oraraa. Ua parau te hoê taeae o tei ite e ua nehenehe roa to ˈna utuafare e ora ma te mau mea materia tano noa e: “E nehenehe au i teie nei e rave hau atu â i roto i te amuiraa no te tavini i to ˈu mau taeae. Ua papu ia ˈu e te haamaitai ra Iehova i te taatoaraa o ta ˈna mau tavini ia tuu ratou i te haamoriraa mau na mua ˈˈe i to ratou iho mau maitai.” Eita anei outou e nehenehe e faaohie i to outou oraraa, ma te fanaˈo i te mau haamaitairaa rahi aˈe i te pae hopea?
5. No te aha e mea titauhia ˈi te mau tutavaraa tamau no te tapea i te mata maitai?
5 Mea titauhia te mau tutavaraa tamau no te patoi i te mana a Satani, ta ˈna ao nounou taoˈa, e to tatou iho huru tia ore. Maoti i te vaiiho i to tatou mata ia nevaneva, e tiatonu noa râ tatou i nia i te faatupuraa i to te Atua hinaaro e to tatou tiaturiraa nehenehe o te ora mure ore.—Mas. 4:25; Kor. 2, 4:18.