E mata maitai anei to oe?
1. Eaha te auraa ia noaa te ‘mata maitai’?
1 E ohipa te mea ta to tatou mata e hiˈo ra i nia i ta tatou mau haaraa. Mea tano hoi ta Iesu i parau: “Te maitai ra to mata, e maramarama ïa to tino atoa.” (Mat. 6:22) Ua “maitai” anaˈe to tatou mata ia au i ta Iesu mau parau, hoê anaˈe ïa fa te tapi: te raveraa i te hinaaro o te Atua. E tapi na mua tatou i te Basileia e eita tatou e vaiiho i te mau taoˈa aore ra te tahi atu mau ohipa faufaa ore ia haafifi i te taviniraa.
2. Eaha te nehenehe e faahape i ta tatou huru hiˈoraa, eaha râ te tauturu mai?
2 Te faufaaraa ia hiˈopoa ia tatou iho: E nehenehe te mau haapurororaa faatianiani aore ra ta vetahi atu mau taoˈa e faahape i ta tatou huru hiˈoraa i tei mea faufaa no tatou. Hou a tapi ai aore ra a hoo ai i te tahi mea o te titau rahi roa i te taime, te moni, aore ra te puai, e mea maitai ia ‘taio i te taoˈa e oti ai.’ E uiui anaˈe ïa, ‘E haamaitai anei te reira i ta ˈu taviniraa ia Iehova aore ra e haafifi mai anei?’ (Luka 14:28; Phil. 1:9-11) E mea paari atoa ia hiˈopoa tamau e nafea ia faaohie atu â i to tatou oraraa no te haa rahi aˈe i roto i te taviniraa.—Kor. 2, 13:5; Eph. 5:10.
3. Eaha te haapii mai i te hoê tuahine tei faaohie i to ˈna oraraa?
3 I to ˈna haamataraa i te taviniraa pionie tamau, ua faaoti te hoê tuahine e tapea i ta ˈna ohipa taime taatoa. Aita oia i imi i te ohipa afa mahana o tei navai hoi no to ˈna mau hinaaro. Ua na ô râ oia: “Eita e nehenehe e tavini e piti fatu. I tia na ïa ia ˈu ia haapae i to ˈu mau hiaai no te haapao i te mau mea ta ˈu e hinaaro mau ra. Ua taa ia ˈu e e taime poto to te mau mea materia e ia tutava vau i te titau i te reira, e rohirohi roa ïa vau.” Ua tia ia ˈna ia faaohie i to ˈna oraraa e ia taui i te ohipa no te tavini noa ei pionie.
4. No te aha e mea faufaa roa ˈi ia tapea noa i te mata maitai i teie nei?
4 No te ru o to tatou tau, e mea faufaa ˈtu â ia tapea noa i te mata maitai. A mairi ai te mahana, te haafatata noa ˈtura tatou i te hopea o teie nei ao e te haamataraa o te ao apî a te Atua. (Kor. 1, 7:29, 31) Ia tiatonu tatou i nia i te ohipa pororaa e ora ˈi tatou e te feia e faaroo maira.—Tim. 1, 4:16.