A faaite i te feruriraa pionie
1. E nafea outou e faataa ˈi i te feruriraa pionie?
1 Noa ˈtu e te tavini ra ratou ei pionie i teie nei aore aita, e nehenehe te feia poro i te Basileia atoa e faaite i te feruriraa pionie. E hinaaro mau to ratou e auraro i te faaueraa e poro e e faariro i te taata ei pǐpǐ. (Mat. 28:19, 20; Ohi. 18:5) Te anaanatae ra ratou i te taata e te rave ra ratou i te mau haapaeraa no te faatupu i ta ratou taviniraa. (Mat. 9:36; Ohi. 20:24) Te oaoa nei te mau tavini a Iehova i te rave i te titauhia no te tauturu ia vetahi ê ia ite i te parau mau. (Kor. 1, 9:19-23) E hiˈo tatou i te hiˈoraa o te hoê tei faaite i te feruriraa mai tera, o Philipa te poro evanelia.
2. E nafea te mau matahiapo e tavini tauturu e pee ai i to Philipa itoito rahi i roto i te taviniraa?
2 Te pororaa e te haapiiraa: I te senekele matamua, ua amo na o Philipa i te mau hopoia rahi i roto i te amuiraa. (Ohi. 6:1-6) E taata poro itoito rahi râ oia i te parau apî maitai. (Ohi. 8:40) Oia atoa i teie mahana, a rave ai ratou i ta ratou mau hopoia i horoahia mai, e nehenehe te mau matahiapo e tavini tauturu e faaite i te feruriraa pionie na roto i te riroraa ei hiˈoraa ei feia poro anaanatae. Auê ïa itoito ta ratou e horoa ra i te amuiraa!—Roma 12:11.
3. E nafea tatou e faaite ai i te feruriraa pionie i mua i te mau tamataraa?
3 I muri aˈe i to Setephano poheraa, ua haafifi roa te hamani-ino-raa i te oraraa o te mau pǐpǐ. Ua tamau noa râ o Philipa i te poro; e tuhaa rahi atoa ta ˈna i rave a haamata ˈi taua ohipa ra i rotopu i to Samaria. (Ohi. 8:1, 4-6, 12, 14-17) E nehenehe tatou e pee i to ˈna hiˈoraa na roto i te tamauraa i te faaite i te parau apî maitai ia tamatahia tatou, e te pororaa ma te maiti ore i te taata atoa ta tatou e farerei.—Ioa. 4:9.
4. Eaha te hiˈoraa ta Philipa i faaite ei orometua haapii?
4 E itehia to Philipa aravihi ei orometua haapii i te Parau a te Atua i roto i te faatiaraa o to te eunuka no Etiopia fariuraa. (Ohi. 8:26-38) Te haapiiraa i te faaohipa maitai i te Bibilia e i te ‘haaferuri i nia i te mau Papai’ o te tahi atu â ïa ravea no te faaite i te feruriraa pionie. (Ohi. 17:2, 3, MN) Mai ia Philipa, e tutava tatou i te faaite i te parau apî maitai i te mau vahi atoa e itehia ˈi te taata e i te mau taime tano atoa.
5. Eaha te nehenehe e tauturu i te mau metua Kerisetiano ia faatupu i te feruriraa pionie i roto i ta ratou mau tamarii?
5 Te utuafare e te amuiraa: Aita e feaaraa e ua ohipa maitai to Philipa huru feruriraa e hiˈoraa i nia i ta ˈna mau tamahine. (Ohi. 21:9) Oia atoa, te faaitoito ra te mau metua Kerisetiano o tei haamau i to ratou oraraa i nia i te mau faufaa a te Basileia i ta ratou mau tamarii ia na reira atoa. E nehenehe te hoê metua o te poro ma te itoito rahi noa ˈtu te rohirohi o te hoê hebedoma ohipa î maitai e tapao maoro i te hoê tamarii.—Mas. 22:6.
6. E nafea tatou e faaite ai i te mauruuru i te mau pionie o ta tatou amuiraa?
6 Ua farii maitai o Philipa ia Paulo e ia Luka, te mau Kerisetiano itoito rahi tei haa puai i roto i te taviniraa ia Iehova. (Ohi. 21:8, 10) E nafea tatou e faaite ai i to tatou mauruuru e e pûpû ai i te turu i to tatou mau hoa itoito rahi i teie mahana? Peneiaˈe e nehenehe tatou e ani i te mau pionie ia apiti ia ratou i te hoê poipoi aore ra taperaa mahana, i te mahana aita i rahi te feia poro. (Phil. 2:4) E nehenehe atoa tatou e titau manihini ia ratou i to tatou fare no te hoê taime auhoaraa maitai. Noa ˈtu eaha to tatou tupuraa, ia tutava paatoa tatou i te faaite i te feruriraa pionie.